ഗുവാഹട്ടി: മത്സരിക്കാന് ടിക്കറ്റ് കിട്ടാത്തതില് പ്രതിഷേധിച്ച് രാജിവെച്ചവര് കോണ്ഗ്രസിലേക്ക് തിരിച്ചുപോകുന്നു. മുഖ്യമന്ത്രി സ്ഥാനാര്ത്ഥിയാകാന് രണ്ടു പ്രമുഖ നേതാക്കള് തമ്മില് മത്സരം. സീറ്റ് കുറഞ്ഞു പോയതില് സഖ്യകക്ഷികളുടെ അമര്ഷം തുടങ്ങി അസമില് ഭരണ തുടര്ച്ച ലക്ഷ്യമിടുന്ന ബിജെപിയ്ക്ക് തെരഞ്ഞെടുപ്പ് തൊട്ടടുത്ത് നില്ക്കേ സര്വ്വത്ര തലവേദന. മത്സരിക്കാന് അവസരം കിട്ടാതെ 12 എംഎല്എമാര് ബിജെപി വിടുകയും ചെയ്തു.
മന്ത്രി സും റംഗേ അടക്കമുള്ളവരാണ് ബിജെപിയില് നിന്നും കഴിഞ്ഞ ദിവസം രാജി വെയ്ക്കുകയും കോണ്ഗ്രസിലേക്ക് പോകുകയും ചെയ്തത്. ബിജെപി വിട്ട 12 എംഎല്എ മാരില് ശിലാദിത്യ ദേവ് സ്വതന്ത്രനായി മത്സരിക്കാനും ഒരുങ്ങുകയാണ്. ഇതിന് പുറമേ സീറ്റ് വിഭജന തര്ക്കത്തില് ബിജെപിയുടെ സഖ്യകക്ഷികളില് തര്ക്കമുണ്ട്. അസമില് 126 സീറ്റുകളില് 92 സീറ്റുകളിലാണ് ബിജെപി മത്സരിക്കുന്നത്. അസോം ഗണ പരിക്ഷത് 26 സീറ്റുകളിലും മറ്റുള്ളവര് 8 സീറ്റുകളിലുമാണ് മത്സരിക്കുന്നത്. ഇതില് കഴിഞ്ഞ തവണ മത്സരിച്ച 30 ല് നിന്നും സീറ്റ് 26 ആക്കി കുറച്ചത് എജിപിയ്ക്ക് നീരസമുണ്ടാക്കിയിട്ടുണ്ട്.
സംസ്ഥാനത്തെ നയിക്കുന്ന കാര്യത്തില് സര്ബാനന്ദ സോനോവാളും മുമ്പ് കോണ്ഗ്രസുകാരനായിരുന്ന ഹിമന്ത ബിശ്വാസ് ശര്മ്മയും തമ്മില് മത്സരവുമുണ്ട്. ആര്എസ്എസും നരേന്ദ്രമോഡിയും സോനോവാളിനെ പിന്തുണയ്ക്കുമ്പോള് അമിത്ഷായ്ക്ക് താല്പ്പര്യം ഹിമാന്ദയെയാണ്. 2016 ല് ബിജെപിയ്ക്ക് 60 സീറ്റുകള് കിട്ടിയിരുന്നു. ഹിമന്ത ബിശ്വാസ് ബിജെപിയുടെ സീറ്റുകള് കുറയ്ക്കാന് നോക്കുകയാണെന്നാണ് ആരോപണം. എന്നാല് സീറ്റ് കുറഞ്ഞാല് പോലും മറ്റു പാര്ട്ടി എംഎല്എ മാരെ മറുകണ്ടം ചാടിച്ച് പിന്തുണ കൂട്ടാമെന്നാണ് ഹിമാന്തയുടെ ചിന്ത.
ബിജെപി പുതിയതായി കൊണ്ടുവരാന് ഉദ്ദേശിക്കുന്ന പൗരത്വ നിയമഭേദഗതിയും അസമിലെ തെരഞ്ഞെടുപ്പില് വലിയ ചര്ച്ചയായിമാറും എന്നത് ബിജെപിയ്ക്ക് ആശങ്കയുണ്ടാക്കുന്നുണ്ട്. ബംഗഌദേശില് നിന്നും ഹിന്ദുക്കള് ഇന്ത്യയിലേക്ക് കുടിയേറാന് കാരണമാകുമെന്ന വിമര്ശനം നിയമത്തിനെതിരേ ഉയരുന്നുണ്ട്. പൗരത്വനിയമത്തിനെതിരേ നടന്ന പ്രക്ഷോഭത്തിന്റെ ഭാഗമായി രൂപം കൊണ്ട അസം ജാതീയ പരിക്ഷത്തും റെയ്ജോര് ദളും ഇത്തവണ മത്സരത്തിനുണ്ട്. അസം തിരിച്ചുപിടിക്കാന് കോണ്ഗ്രസും തന്ത്രങ്ങള് മെനഞ്ഞു തുടങ്ങിയിട്ടുണ്ട്.
ബിജെപിയ്ക്ക് ഒപ്പമുള്ള ഘടകകക്ഷികള് സീറ്റ് വിഭജനത്തില് പ്രശ്നങ്ങള് സൃഷ്ടിക്കുമ്പോള് കഴിഞ്ഞ തവണ 74 സീറ്റില് മല്സരിച്ച് 13 ല് ജയിച്ച എഐയുഡിഎഫ് ഇത്തവണ മഹാസഖ്യത്തില് കോണ്ഗ്രസിനൊപ്പമുണ്ട്. 21 സീറ്റില് അവര് തൃപ്തരാണ്. കഴിഞ്ഞ തവണ 13.05% വോട്ട് നേടിയ പാര്ട്ടിയാണ് ഇവര്. പൗരത്വ ഭേദഗതി നിയമം നടപ്പാക്കില്ലെന്നാണു കോണ്ഗ്രസ് ജനങ്ങള്ക്ക് നല്കിയിരിക്കുന്ന വാഗ്ദാനം. ഇതിനു പുറമേ തോട്ടം തൊഴിലാളികള്ക്ക് അടിസ്ഥാന കൂലി 365 ആക്കാമെന്നും അഞ്ചുവര്ഷം കൊണ്ട് അഞ്ചു ലക്ഷം തൊഴിലവസരം, 200 യൂണിറ്റ് സൗജന്യ വൈദ്യുതി, വീട്ടമ്മമാര്ക്ക് പ്രതിമാസം 2000 രൂപ തുടങ്ങി അനേകം വാഗ്ദാനങ്ങളാണ് കോണ്ഗ്രസ് പ്രകടന പത്രികയില് പറയുന്നത്.
