കഴക്കൂട്ടം: പണവും സീറ്റും വാഗിദാനം ചെയ്ത് ബി.ജെ.പി. ഏജന്റുമാര് തന്നെ സമീപിച്ചെന്ന വെളിപ്പെടുത്തലുമായി കോണ്ഗ്രസ് നേതാവും മുന് കഴക്കൂട്ടം എം.എല്.എ.യുമായ എം.എ. വാഹിദ്. ബിജെപി സ്ഥാനാര്ത്ഥിയാക്കാമെന്നും സംസ്ഥാനത്തെ ഏത് മണ്ഡലത്തില് വേണമെങ്കിലും മത്സരിക്കാമെന്നും ഏജന്റുമാര് വാഗ്ദാനം ചെയ്തെന്നും വാഹിദ് വ്യക്തമാക്കുന്നു. കഴക്കൂട്ടത്ത് ബി.ജെ.പി. ശോഭ സുരേന്ദ്രന് സീറ്റു നിഷേധിക്കുകയും കോണ്ഗ്രസ് നേതാവിന് അവസരം നല്കുമെന്നു പറഞ്ഞതിനു പിന്നാലെയാണ് എം.എ. വാഹിദിന്റെ വെളിപ്പെടുത്തല്.
ഭരണം അട്ടിമറിക്കാനുള്ള ബി.ജെ.പി.യുടെ ഉത്തരേന്ത്യന് മോഡല് കേരളത്തിലും പരീക്ഷിക്കാനുള്ള നീക്കമായാണ് ഇതിനെ വിലയിരുത്തുന്നത്. പ്രധാനപ്പെട്ട നേതാക്കളെ ലക്ഷ്യമിട്ടാണ് ബി.ജെ.പി. ഏജന്റുമാരെ രംഗത്തിറക്കി വിലപേശുന്നതെന്നും വാഹിദ് വ്യക്തമാക്കി. താന് ബി.ജെ.പി.യിലേക്കില്ല എന്നകാര്യം വ്യക്തമാക്കിയതായും വാഹിദ് വെളിപ്പെടുത്തി.
പാര്ട്ടിക്കുള്ളില് അതൃപ്തരായ നേതാക്കളെയാണ് പ്രധാനമായും ബി.ജെ.പി. ലക്ഷ്യമിടുന്നത്. ഒരിക്കല്മാത്രമേ താന് പാര്ട്ടിക്കെതിരായ നിലപാട് സ്വീകരിച്ചിട്ടുള്ളൂ. അത് 2001-ല് ആണ്. അതില് താന് പശ്ചാത്തപിക്കുന്നെന്നും ഇനി ഒരിക്കല്ക്കൂടി അത്തരം അവസ്ഥയിലേക്കെത്താന് താല്പ്പര്യമില്ലെന്നും വാഹിദ് വ്യക്തമാക്കി.
