ന്യൂഡല്ഹി: അന്വേഷണ ഉദ്യോഗസ്ഥര്ക്ക് എതിരേ കേരളാപോലീസ് കേസെടുത്തതിന് പിന്നാലെ ഇ.ഡി. വീണ്ടും സുപ്രീംകോടതിയെ സമീപിച്ചു. നിയമവാഴ്ച ഉറപ്പാക്കുന്നതിന് കേരളത്തിലെ സര്ക്കാര് തന്നെ തടസ്സം നില്ക്കുന്നതായും സ്വര്ണ്ണക്കടത്ത് കേസില് മുഖ്യമന്ത്രിയുടെ പേര് പറയാന് സമ്മര്ദ്ദം ചെലുത്തുന്നുവെന്ന് വരുത്താന് നീക്കം നടക്കുന്നെന്നും സിവില് പോലീസ് ഉദ്യോഗസ്ഥയെ കൊണ്ട ഇതിനായി മൊഴി നല്കിപ്പിച്ചുവെന്നും സുപ്രീംകോടതിയെ അറിയിച്ചു.
സ്വര്ണ്ണക്കടത്ത് കേസില് ശിവശങ്കറിന്റെ ജാമ്യം ഉടന് റദ്ദാക്കണമെന്നും ആവശ്യപ്പെട്ടിട്ടുണ്ട്. സര്ക്കാരിലെ സ്വാധീനം ഉപയോഗിച്ച് ശിവശങ്കര് മകസ് അട്ടിമറിക്കാന് ശ്രമിക്കുന്നുവെന്നും അന്വേഷണ ഉദ്യോഗസ്ഥര്ക്കെതിരേ വ്യാജ തെളിവുകള് ഉണ്ടാക്കാന് ശ്രമിക്കുന്നതായും ആരോപണമുണ്ട്.
ശിവശങ്കറിന് ജാമ്യം അനുവദിച്ചുകൊണ്ടുള്ള ഹൈക്കോടതി ഉത്തരവിനെതിരെ എന്ഫോഴ്സ്മെന്റ് ഡയറക്ടറേറ്റ് നല്കിയ ഹര്ജി നിലവില് സുപ്രീം കോടതിയുടെ പരിഗണനയിലാണ്. ജാമ്യം അനുവദിച്ച ഉത്തരവ് സ്റ്റേ ചെയ്യണമെന്ന ആവശ്യം നേരത്തെ കോടതി തള്ളിയിരുന്നു. ഇതിന് പിന്നാലെയാണ് ലൈഫ് അഴിമതി അന്വേഷിക്കുന്ന ഇ.ഡി. ഉദ്യോഗസ്ഥര്ക്ക് എതിരേ ക്രൈംബ്രാഞ്ച് കേസെടുത്ത വിവരം ഇ.ഡി. സുപ്രീംകോടതിയെ അറിയിച്ചത്. മുഖ്യമന്ത്രിയുടെ പേര് പറയാന് സ്വപ്നാ സുരേഷിന് മേല് അന്വേഷണസംഘം സമ്മര്ദ്ദം ചെലുത്തിയെന്നാണ് കേസ്.
ഇക്കാര്യത്തില് തന്റെ മൊഴിയാണെന്ന് സംശയിക്കുന്നതായി സ്വപ്ന നല്കിയ മൊഴിയുടെ അടിസ്ഥാനത്തില് ശബ്ദരേഖയുടെ ഉറവിടം അന്വേഷിക്കണമെന്ന് ഇ.ഡി. നല്കിയ പരാതിയിലായിരുന്നു അന്വേഷണം. ഇ.ഡി.യുടെ കസ്റ്റഡിയിലിരിക്കെ രാത്രി ഏറെ വൈകിയും പുലര്ച്ചെയുമായി മുഖ്യമന്ത്രിയുടെ പേര് പറയാന് എന്ഫോഴ്സ്മെന്റ് ഉദ്യോഗസ്ഥര് നിര്ബ്ബന്ധിക്കുന്നത് കേട്ടുവെന്നാണ് രണ്ടു വനിതാ പോലീസ് ഉദ്യോഗസ്ഥരും മൊഴി നല്കി. സ്വപ്നയുടെ ശബ്ദരേഖ പരിശോധന നടത്തിയ അന്വേഷണ സംഘത്തിന്റെ റിപ്പോര്ട്ടും കേസെടുക്കാന് കാരണമായി.
