തിരുവനന്തപുരം: കേന്ദ്ര-സംസ്ഥാന സര്ക്കാരുകള്ക്കെതിരെ രൂക്ഷ വിമര്ശനവുമായി ലത്തീന് സഭ. കൊല്ലം രൂപത ഇതിനെതിരെ ഇടയ ലേഖനം പുറത്തിറക്കിയിരിക്കുകയാണ്. മത്സ്യബന്ധന മേഖലയെ ഇല്ലായ്മ ചെയ്യാനും കുത്തകകള്ക്ക് വില്ക്കാനുമുള്ള ശ്രമം നടക്കുന്നു എന്നാണ് ലേഖനത്തില് പരാമര്ശിച്ചിരിക്കുന്നത്. മത്സ്യത്തൊഴിലാളികള്ക്കുള്ള ആനുകൂല്യങ്ങളില് പലതും സര്ക്കാര് ഇല്ലാതാക്കിയെന്നും കടലിലെ ധാതുക്കള് ഇല്ലാതാക്കാനുള്ള നീക്കം നടത്തുകയാണെന്നും ആക്ഷേപമുണ്ട്.
മത്സ്യത്തൊഴിലാളികള്ക്ക് മാത്രമായി ഉണ്ടായിരുന്ന ഭവന നിര്മ്മാണ പദ്ധതി ലൈഫ് മിഷനില് ഉള്പ്പെടുത്തി സംസ്ഥാന സര്ക്കാര് ആനുകൂല്യങ്ങള് നിഷേധിച്ചപ്പോള് കേന്ദ്രം ബ്ലൂ എക്കോണമി എന്ന പേരില് കടലില് ധാതുവിഭവങ്ങള് കണ്ടെത്തുന്നതിനുള്ള ഖനനാനുമതി നല്കി. ടൂറിസത്തിന്റെയും വികസനത്തിന്റെയും പേര് പറഞ്ഞ് പരമ്പരാഗത മത്സ്യത്തൊഴിലാളി മേഖലകളെ തകര്ത്തെറിയാനാണ് ശ്രമം. അത്തരം നയങ്ങളും തീരുമാനങ്ങളും ഏതു സര്ക്കാര് കൈക്കൊണ്ടാലും എതിര്ക്കപ്പെടേണ്ടതാണ്. മത്സ്യത്തൊഴിലാളികളെ തകര്ക്കാന് ശ്രമിക്കുന്നവരെ തിരിച്ചറിയുകയും പ്രതിരോധിക്കുകയും ചെയ്യുന്നത് നിലനില്പ്പന്റെ പ്രശ്നമാണെന്നും ഇടയ ലേഖനത്തില് പറയുന്നു.
വന വാസികള്ക്കായി പ്രത്യേക പദ്ധതികളാണുള്ളത്. വനം സംബന്ധിച്ച് പല അവകാലങ്ങളും അവര്ക്കായി സര്ക്കാര് അനുവദിച്ച് നല്കുന്നുണ്ട്. അത്തരം അവകാശങ്ങള് മത്സ്യത്തൊഴിലാളികള്ക്കും ലഭ്യമാക്കണമെന്നാണ് രൂപത മുന്നോട്ടുവെക്കുന്ന ആവശ്യം. കടലിന്റെ മക്കള് കേരളത്തിന്റെ സൈന്യമാണെന്നു പറയുമ്പോഴും ഈ സൈന്യത്തിനെ മുക്കിക്കൊല്ലുന്ന നയങ്ങള്ക്കും നിയമങ്ങള്ക്കും ഭരണവര്ഗം കൂട്ടുനില്ക്കുകയാണെന്നുമുള്ള ശക്തമായ വിമര്ശനമാണ് ലത്തീന് സഭയുടെ കൊല്ലം രൂപത ഉന്നയിക്കുന്നത്.
