ആലുവ: സംസ്ഥാന സര്ക്കാറിന്റെ സമ്മര് ബമ്പര് ഭാഗ്യക്കുറിയിലെ ആറ് കോടി രൂപ ഒന്നാം സമ്മാനം കീഴ്മാട് ചക്കംകുളങ്ങര പാലച്ചോട്ടില് പി.കെ. ചന്ദ്രന്. ഏജന്റിന്റെ പക്കല്നിന്ന് കടമായി വാങ്ങിയ ടിക്കറ്റിലൂടെയാണ് ചന്ദ്രനെ തേടി ഭാഗ്യദേവത എത്തിയത്. ഞായറാഴ്ച നടന്ന നറുക്കെടുപ്പിലാണ് എസ്.ഡി. 316142 എന്ന നമ്പറിലൂടെ ചന്ദ്രന് സമ്മാനം നേടിയത്.
പട്ടിമറ്റം ഭാഗ്യലക്ഷ്മി ഏജന്സിയില്നിന്ന് ലോട്ടറിയെടുത്ത് വില്പ്പന നടത്തുന്ന പട്ടിമറ്റം വലമ്പൂര് സ്വദേശിനി സ്മിജ കെ. മോഹനാണ് ചന്ദ്രന് ടിക്കറ്റ് നല്കിയത്. രാജഗിരി ആശുപത്രിക്ക് മുന്പിലാണ് സ്മിജയുടെ ടിക്കറ്റ് കച്ചവടം. ഞായറാഴ്ച 12 ബമ്പര് ടിക്കറ്റുകള് ബാക്കി വന്നതോടെ സ്ഥിരമായി ടിക്കറ്റെടുക്കുന്ന ചന്ദ്രനോട് ഒരു ടിക്കറ്റെടുക്കാന് ആവശ്യപ്പെടുകയായിരുന്നു. ഫോണിലൂടെ നമ്പറുകള് ചോദിച്ചറിഞ്ഞ ചന്ദ്രന് ടിക്കറ്റ് തെരഞ്ഞെടുത്തു.
ഞായറാഴ്ച വൈകിട്ടോടെ തന്റെ ടിക്കറ്റിനാണ് ഒന്നാം സമ്മാനമെന്ന് സ്മിജയറിഞ്ഞു. ഇക്കാര്യം ചന്ദ്രനെ വിളിച്ചുപറഞ്ഞ് രാത്രിയോടെ ടിക്കറ്റ് കൈമാറി. കീഴ്മാട് ഡോണ് ബോസ്കോയില് പൂന്തോട്ട പരിപാലകനായി ജോലി ചെയ്യുകയാണ് ചന്ദ്രന്.
ഭാര്യ: ലീല. മക്കള്: ചലിത, അഞ്ജിത, അഞ്ജിത്ത്. മൂത്തമകള് ചലിതയുടെ ഭര്ത്താവിന്റെ വീട്ടില് വീടുപണി നടക്കുകയാണ് അവരെ സാമ്പത്തികമായി സഹായിക്കും. രണ്ടാമത്തെ മകളുടെ വിവാഹവും ബി. ടെകിന് പഠിക്കുന്ന മകന്റെ പഠന ആവശ്യങ്ങള്ക്കുമാണ് പണം ചെലവഴിക്കാന് ഉദ്ദേശിക്കുന്നതെന്ന് ചന്ദ്രന് പറഞ്ഞു. കുട്ടമശേരി എസ്.ബി.ഐ. ബാങ്കിലെത്തി ടിക്കറ്റ് കൈമാറി.
