ഗുരുവായൂര്: ബിജെപി സ്ഥാനാര്ത്ഥിയുടെ പത്രിക തള്ളിയതോടെ അടിച്ചുവെച്ച പോസ്റ്ററുകളും പ്രസ്താവനകളും ഫ്ളെക്സുകളും എന്തു ചെയ്യണമെന്ന് അറിയാതെ അണികള്. സ്ഥാനാര്ഥിയുടെ ക്ലോസ്അപ്പ് ചിത്രം, കൈവീശി നില്ക്കുന്നത്, കൈകൂപ്പിയുള്ളത് എന്നിങ്ങനെ പല രീതിയിലുള്ള രണ്ടു ലക്ഷത്തിലധികം പോസ്റ്ററുകളാണ് തെരഞ്ഞെടുപ്പുമായി ബന്ധപ്പെട്ട് ഗുരുവായൂരിലെ ബിജെപി ഓഫീസുകളില് കിടക്കുന്നത്.
ഗുരുവായൂര് നിയോജക മണ്ഡലത്തില് എന്ഡിഎയുടെ സ്ഥാനാര്ത്ഥി നിവേദിതയായിരുന്നു. ഇവര്ക്ക് വേണ്ടി വാള്പോസ്റ്ററുകള് 25,000, 55,000 വീതം നാലു തരത്തിലുള്ളവ വരുന്ന രണ്ടുലക്ഷം വര്ണപോസ്റ്ററുകള് എന്നിവയ്ക്ക് പുറമേ 2000 ഫ്ളക്സ് ബോര്ഡുകളും 75,000 അഭ്യര്ഥനകളും തയ്യാറാക്കി. സ്ഥാനാര്ത്ഥിയായതോടെ നേരത്തേ തന്നെ നിവേദിത പ്രചരണവും തുടങ്ങിയിരുന്നു.
സാമൂഹ്യ മാധ്യമങ്ങളില് ഇവര് വോട്ടു ചോദിക്കുന്നതിന്റെയും മറ്റും അനേകം ചിത്രങ്ങളായിരുന്നു ഇവര് പോസ്റ്റ് ചെയ്തിരുന്നത്. പത്രിക തള്ളിയതോടെ എന്ഡിഎ യില് മത്സരിക്കാന് കഴിയുന്ന ആളെ കണ്ടെത്താനുള്ള നെട്ടോട്ടത്തിലാണ് ബിജെപി ഇപ്പോള്. തെരഞ്ഞെടുപ്പിന് മുമ്പ് എന്ഡിഎ സ്ഥാനാര്ത്ഥിയാകാന് മുന്നിലേക്ക് വരികയും ബിജെപി തള്ളുകയും ചെയ്ത ഡമോക്രാറ്റിക് സോഷ്യലിസ്റ്റ് ജസ്റ്റീസ് പാര്ട്ടി ട്രഷറര് ദിലീപ് നായര്ക്ക് പിന്തുണ നല്കാനുള്ള ആലോചനയിലാണ്.
നേരത്തേ ദിലീപിനെ ബിജെപി കണ്ടില്ലെന്ന് നടിച്ചതിനെ തുടര്ന്നു ഗുരുവായൂര് അടക്കം 10 മണ്ഡലങ്ങളില് സംഘടന സ്ഥാനാര്ഥികളെ നിര്ത്തി. ഡി.എസ്.ജെ.പി. സംസ്ഥാന ട്രഷറര്കൂടിയായ ദിലീപ് നായര് എന്.ഡി.എയുടെ ഭാഗമായി മത്സരിക്കാന് പൂര്ണസമ്മതമാണെന്നു ബി.ജെ.പി. നേതൃത്വത്തെ അറിയിച്ചിട്ടുണ്ട്. വണ് ഇന്ത്യ വണ് പെന്ഷനുവേണ്ടി മത്സരിക്കുന്ന ആന്റണി തലക്കോട്ടൂരാണ് മറ്റൊരു സ്വതന്ത്രന്. ഇദ്ദേഹവുമായും ബി.ജെ.പി. നേതൃത്വം ചര്ച്ച നടത്തിയിരുന്നു.
