ന്യൂഡല്ഹി: രാജ്യത്ത് ഇപ്പോള് അനുഭവപ്പെടുന്നതു കോവിഡിന്റെ ''രണ്ടാംവരവ്''തന്നെയെന്നു സ്റ്റേറ്റ് ബാങ്ക് ഓഫ് ഇന്ത്യയുടെ റിപ്പോര്ട്ട്. ഈയവസ്ഥ കഴിഞ്ഞമാസം 15 മുതല് 100 ദിവസത്തേക്കു നീണ്ടുനില്ക്കുമെന്നും റിപ്പോര്ട്ടില് പറയുന്നു. ഫെബ്രുവരി മുതല് പ്രതിദിന കോവിഡ് കേസുകളുടെ എണ്ണം വീണ്ടും കുതിച്ചുയരുകയാണ്.
ഇന്നലെ മാത്രം കോവിഡ് ബാധിതരുടെ എണ്ണം 53,476 ആണ്. അഞ്ചുമാസത്തിനിടയിലെ റെക്കോഡാണിത്. കഴിഞ്ഞ 23 മുതലുള്ള സൂചനപ്രകാരം രണ്ടാം കോവിഡ് തരംഗത്തില് 25 ലക്ഷം പേരെങ്കിലും രോഗബാധിതരാകും. പ്രാദേശികമായ ലോക്ക്ഡൗണുകള് ഇനി ഫലം ചെയ്യില്ലെന്നും കൂട്ടത്തോടെയുള്ള വാക്സിനേഷനാണ് ഏകപ്രതീക്ഷയെന്നും 28 പേജുള്ള റിപ്പോര്ട്ടില് പറയുന്നു.
കോവിഡ് രണ്ടാംതരംഗം ഏപ്രില് പകുതിയോടെ മൂര്ധന്യത്തിലെത്തും. ചില സംസ്ഥാനങ്ങള് ഏര്പ്പെടുത്തിയ ലോക്ക്ഡൗണിന്റെയും നിയന്ത്രണങ്ങളുടെയും സാമ്പത്തികപ്രത്യാഘാതം അടുത്തമാസംതന്നെ പ്രകടമാകുമെന്നും റിപ്പോര്ട്ട് മുന്നറിയിപ്പ് നല്കുന്നു.
പ്രതിദിന വാക്സിനേഷന്റെ എണ്ണം ഇപ്പോഴത്തെ 34 ലക്ഷത്തില്നിന്ന് 40-45 ലക്ഷമായി ഉയര്ത്തണം. അങ്ങനെയെങ്കില് 45 വയസിനുമേല് പ്രായമുള്ളവരുടെ വാക്സിനേഷന് നാലുമാസത്തിനകം പൂര്ത്തിയാകും. ഇരട്ടജനിതകവ്യതിയാനം സംഭവിച്ച കൊറോണ െവെറസിന്റെ സാന്നിധ്യം 18 സംസ്ഥാനങ്ങളില് തിരിച്ചറിഞ്ഞിട്ടുണ്ട്.
കോവിഡിന്റെ രണ്ടാംതരംഗം പ്രതീക്ഷിച്ചതിലും നേരത്തേ എത്തിയ സാഹചര്യത്തില് പരിശോധന, മാസ്ക് ഉപയോഗം, വാക്സിനേഷന് എന്നിവയിലാണു ശ്രദ്ധ കേന്ദ്രീകരിക്കേണ്ടതെന്ന് ഇന്ത്യന് കൗണ്സില് ഓഫ് മെഡിക്കല് റിസര്ച്ച് ഡയറക്ടര് ജനറല് ബല്റാം ഭാര്ഗവ ചൂണ്ടിക്കാട്ടി.
