ന്യൂഡല്ഹി: രാജ്യത്ത് കൊവിഡ് കുതിച്ചുയരുന്ന സാഹചര്യത്തില് പശ്ചിമ ബംഗാള് തെരഞ്ഞെടുപ്പിനു മുന്നോടിയായി നടത്താനിരുന്ന എല്ലാ റാലികളും റദ്ദാക്കിയതായി രാഹുല് ഗാന്ധി. വൈറസ് വ്യാപനം കുറയ്ക്കാനായി ആള്ക്കൂട്ടങ്ങള് ഒഴിവാക്കുന്നതിന്റെ ഭാഗമായാണ് റാലികള് റദ്ദാക്കുന്നതെന്ന് രാഹുല് പറഞ്ഞു. ഇതറിയിച്ച് മുന് കോണ്ഗ്രസ് അധ്യക്ഷന് കുറിച്ച ട്വീറ്റിനെ സ്വാഗതം ചെയ്ത് നിരവധി പേരാണ് രംഗത്തെത്തിയിരിക്കുന്നത്.
'കൊവിഡ് സാഹചര്യം പരിഗണിച്ച്, പശ്ചിമ ബംഗാളിലെ എന്റെ എല്ലാ റാലികളും ഞാന് നിര്ത്തിവെക്കുകയാണ്.'നിലവിലെ സാഹചര്യത്തില് വലിയ റാലികള് സംഘടിപ്പിക്കുന്നതിന്റെ പ്രത്യാഘാതത്തെപ്പറ്റി എല്ലാ രാഷ്ട്രീയ നേതാക്കളും ചിന്തിക്കണമെന്ന് ഞാന് ആവശ്യപ്പെടുകയാണ്.' രാഹുല് ഗാന്ധി ട്വീറ്റില് ആവശ്യപ്പെട്ടു.
എട്ട് ഘട്ടങ്ങളിലായി നിയമസഭാ തിരഞ്ഞെടുപ്പ് നടക്കുന്ന ബംഗാളില് പെടുന്നനെയാണ് കോവിഡ് വ്യാപനം രൂക്ഷമായത്. മാനദണ്ഡങ്ങള് ആദ്യ അഞ്ച് ഘട്ടങ്ങളിലെ തിരഞ്ഞെടുപ്പ് പ്രചാരണ പരിപാടികളിലും രാഷ്ട്രീയ കക്ഷികള് ലംഘിച്ചിരുന്നു. പിന്നീട് തിരഞ്ഞെടുപ്പ് കമ്മീഷന് നിര്ദ്ദേശങ്ങള് കര്ശനമാക്കി പുറപ്പെടുവിപ്പിച്ചു.
പരസ്യപ്രചരണസമയം കുറയ്ക്കുകയും, നിശബ്ദപ്രചാരണത്തിന്റെ സമയം 72 മണിക്കൂറായി ദീര്ഘിപ്പിക്കുകയും ചെയ്തു. രാത്രി ഏഴ് മുതല് രാവിലെ പത്ത് മണി വരെ റാലികളോ പൊതുയോഗങ്ങളോ നടത്തുകയോ കൂട്ടം കൂടുകയോ ചെയ്യരുതെന്നും ഉത്തരവിട്ടു. ബംഗാളിലെ തെരഞ്ഞെടുപ്പുമായി ബന്ധപ്പെട്ട് ബി.ജെ.പി വമ്പന് റാലികളാണ് നടത്തിയിരുന്നത്. അതേസമയം കോവിഡ് വ്യാപനം രൂക്ഷമായ സാഹചര്യത്തില് മൂന്നുഘട്ട തിരഞ്ഞെടുപ്പുകള് ഒരുമിച്ച് നടത്തണമെന്ന് മുഖ്യമന്ത്രി മമത ബാനര്ജിയടക്കം ആവശ്യമുന്നയിച്ചിരുന്നു.
