ന്യൂഡല്ഹി: കോവിഡ് രണ്ടാം തരംഗം രൂക്ഷമാകുന്ന സാഹചര്യത്തില് രാജ്യത്ത് ഓക്സിജന് ക്ഷാമം ഉള്പ്പെടെ അതിരൂക്ഷമാകുന്നു. ഇന്ത്യയുടെ കോവിഡ് പോരാട്ടത്തിനൊപ്പം ലോകം മുഴുവന് സഹായഹസ്തവുമായി ഒപ്പമുണ്ട്. മറ്റ് രാജ്യങ്ങളില് നിന്ന് ഓക്സിജന് ഉള്പ്പെടെ ഇറക്കുമതി ചെയ്തും ലോകം ഇന്ത്യയെ ചേര്ത്ത് പിടിക്കുമ്പോള് ഐപിഎല്ലില് കൊല്ക്കത്ത നൈറ്റ് റൈഡേഴ്സ് താരമായ ഓസ്ട്രേലിയന് പേസര് പാറ്റ് കമ്മിന്സും ഇന്ത്യയ്ക്കായി സഹായഹസ്തം നീട്ടിയിരിക്കുകയാണ്.
കോവിഡ് കേസുകള് വര്ധിക്കുന്ന പശ്ചാത്തലത്തില് രാജ്യത്തെ ആശുപത്രികളിലേക്ക് ഓക്സിജന് എത്തിക്കാനായി പിഎം കെയേഴ്സ് ഫണ്ടിലേക്ക് 50,000 ഡോളര് നല്കുമെന്ന് തിങ്കളാഴ്ച ആണ് പാറ്റ് കമ്മിന്സ് അറിയിച്ചത്. ഐപിഎല്ലിലെ സഹതാരങ്ങളോടും സഹായകരം നീട്ടാന് താരം അഭ്യര്ത്ഥിച്ചു.
'വര്ഷങ്ങളായി ഞാന് വളരെയധികം സ്നേഹിക്കുന്ന രാജ്യമാണ് ഇന്ത്യ. താന് കണ്ടുമുട്ടിയതില് വളരെ ദയയുള്ളതുമായ ആളുകളാണ് ഇവിടെയുള്ളത്. ഈ സമയത്ത് പലരും വളരെയധികം കഷ്ടപ്പെടുന്നുണ്ടെന്ന് അറിയുന്നത് എന്നെ ദു:ഖിപ്പിക്കുന്നു' കമ്മിന്സ് പ്രസ്താവനയില് വ്യക്തമാക്കി.
അതേസമയം കോവിഡ് അതിരൂക്ഷമാകുന്നതിനിടെ ഐപിഎല് തുടരുന്നത് ഉചിതമാണോ എന്ന ചര്ച്ചകള് നടക്കുന്നുണ്ട്. എന്നാല് ഇത്രയും ബുദ്ധിമുട്ടുള്ള സമയത്ത് ഓരോ ദിവസവും കുറച്ച് മണിക്കൂര് സന്തോഷവും ആശ്വാസവും ജനങ്ങള്ക്ക് നല്കുമെന്നും അദേഹം കൂട്ടിച്ചേര്ത്തു.
