ഹവാന: മഹാമാരിയില് കൂട്ടമരണങ്ങള് കാണുന്ന സാഹചര്യത്തില് കോവിഡിനെതരേയുള്ള പോരാടാന് കെല്പ്പില്ലാത്ത ദരിദ്ര രാജ്യങ്ങള്ക്ക് തുണയാകാന് ക്യൂബ. കോവിഡിന്റെ രണ്ടാം തരംഗത്തില് പെട്ട് ജനങ്ങള് വിവിധ തരത്തിലുള്ള ബുദ്ധിമുട്ടുമായി മരിക്കുമ്പോള് ബഹുരാഷ്ട്ര മരുന്നുനിര്മാണക്കമ്പനികളുടെ സഹകരണം ഇല്ലാതെ ദക്ഷിണ അമേരിക്കന് രാജ്യമായ ക്യൂബ വികസിപ്പിക്കുന്നത് അഞ്ച് വാക്സിനുകള്.
സോബറാന 2, സോബറാന 1, സോബറാന പ്ലസ്, അബ്ഡല, മംബീസ എന്നിങ്ങനെയാണ് ക്യൂബയില് വികസിപ്പിക്കുന്ന വാക്സിനുകള്. ഇതില് സോബറാന 2 ഏറെക്കുടെ പൂര്ത്തിയായിരിക്കുകയും മനുഷ്യരില് കുത്തിവെയ്ക്കാന് ഒരുങ്ങുകയുമാണ്. അന്തിമ പരീക്ഷണം കൂടി വിജയമായാല് കോവിഡിനെതിരേ വാക്സിന് പരീക്ഷിക്കുന്ന ഏക ലാറ്റിനമേരിക്കന് രാജ്യമെന്ന ഖ്യാതിയാണ് തേടി വരിക. ബ്രസീല് അടക്കമുള്ള രാജ്യങ്ങള് കോവിഡില് അനേകം മരണങ്ങള് കണ്ട സാഹചര്യത്തിലാണ് ക്യൂബ വാക്സിനുമായിവരുന്നത്.
അഞ്ചു മരുന്നുകളില് രണ്ടെണ്ണം മൂന്ന് പരീക്ഷണങ്ങള് പൂര്ത്തിയാക്കി കഴിഞ്ഞു. ലോകാരോഗ്യ സംഘടനയുടെ നേതൃത്വത്തിലുള്ള വാക്സിന് പങ്കിടല് പദ്ധതിയായ ‘കോവാക്സി’ല് ഇല്ലാതെയാണ് ക്യൂബ അഞ്ച് വാക്സിനുകള് വികസിപ്പിക്കുന്നത്. ബഹുരാഷ്ട്ര മരുന്നുനിര്മാണക്കമ്പനികളുമായും ക്യൂബയ്ക്ക് കരാറില്ല. ക്യൂബ വാക്സിന് വികസിപ്പിക്കുന്നത് അറിഞ്ഞ് മെക്സിക്കോയും അര്ജന്റീനയും അടക്കമുളള രാജ്യങ്ങള് വാക്സിനില് താല്പ്പര്യം പ്രകടിപ്പിച്ചിട്ടിട്ടുണ്ട്. 100 മില്യണ് ഡോസിന്റെ വാക്സിന് വാര്ഷിക കരാറിന് ചില രാജ്യങ്ങള് ശ്രമിക്കുകയും ചെയ്തിട്ടുണ്ട്.
പശ്ചാത്യരാജ്യങ്ങളില് നിന്ന് വാക്സിന് വാങ്ങാന് കഴിവില്ലാത്ത ദരിദ്രരാജ്യങ്ങള് ക്യൂബയെ വാക്സിനായി സമീപിച്ചിട്ടുണ്ട്. ഇതിലൂടെ കോവിഡിന്റെ ആദ്യ തരംഗത്തില് തകര്ന്ന സമ്പദ് വ്യവസ്ഥയെ വാക്സിനേഷന് നടപടികള് ത്വരിതമാക്കുന്നതോടെ പുനരുജ്ജീവിപ്പിക്കാമെന്ന പ്രതീക്ഷയിലാണ് രാജ്യം. കോവിഡിനെതിരേ പ്രതിരോധങ്ങള്ക്കായി വിവിധ രാജ്യങ്ങളിലേക്ക് ആരോഗ്യപ്രവര്ത്തകരെ അയച്ച രാജ്യമാണ് ക്യൂബ.
