ന്യൂഡല്ഹി: കോവിഡ് രോഗിയെ കൊണ്ടുപോകാന് ഒരു ലക്ഷം രൂപ വാങ്ങിയ ആംബുലന്സ് ഉടമ അറസ്റ്റില്. എംബിബിഎസ് ഡോക്ടറും ഇന്ദ്രപുരിയിലെ ഡാഷ്ഗരാ ഗ്രാമത്തില് താമസിക്കുന്നയാളുമായ മിമോ കുമാര് ബുണ്ടവാളിനെയാണ് അറസ്റ്റ് ചെയ്തത്. കോവിഡ് ബാധിതനായ ആളെ ലുധിയാനയില് നിന്നും ഗുര്ഗോണിലേക്ക് കൊണ്ടുപോകാനാണ് വന് തുക വാങ്ങിയത്.
രോഗിയെ കൊണ്ടുപോകാന് വീട്ടുകാര് ഡല്ഹിയിലെ ഓപ്പറേറ്ററെ സമീപിച്ചെങ്കിലും ആംബുലന്സ് സംഘടിപ്പിക്കാന് ഇയാള്ക്ക് കഴിയാതെ വന്നതോടെയാണ് ഇവര് മിമോയെ സമീപിച്ചത്. ആദ്യം ഇയാള് ചോദിച്ച കൂലി 1.40 ലക്ഷമായിരുന്നു. എന്നാല് ഓക്സിജന് തങ്ങളുടെ പക്കലുണ്ടെന്ന് അറിയിച്ചതോടെ 20,000 രൂപ കുറച്ചു. 95,000 രൂപ ഇയാള് അഡ്വാന്സായും വാങ്ങി.
ലുധിയാനയില് എത്തിയപ്പോള് തന്നെ 25,000 രൂപ കൂടി വാങ്ങിയതായി രോഗിയുടെ മകള് പറഞ്ഞു. ആംബുലന്സ് സൗകര്യം നല്കി ഇന്ദ്രപുരി സ്വദേശി ജനങ്ങളെ കൊള്ളയടിക്കുന്നെന്നു വിവരം കിട്ടിയതിനെ തുടര്ന്നായിരുന്നു പോലീസ് ഇടപെടല്. ഇയാള് രോഗികളെ കയറ്റിയിറക്കാന് സാധാരണ നിരക്കിന്റെ നാലും അഞ്ചും മടങ്ങ് തുക ഇടാക്കുന്നതായിട്ടാണ് പോലീസിന് വിവരം കിട്ടിയത്.
തുടര്ന്ന് പോലീസ് ബുണ്ടാവലിന്റെ ആംബുലന്സ് കമ്പനിയുടെ സേവനം സംബന്ധിച്ച അന്വേഷണം നടത്തി. പിന്നീട് ബുണ്ടാവലിനെതിരേ പോലീസ് കേസെടുത്ത ശേഷമായിരുന്നു അറസ്റ്റ് ചെയ്തത്. കഴിഞ്ഞ രണ്ടു വര്ഷമായി ഈ എംബിബിഎസ് ഡോക്ടര് ആംബുലന്സ് സര്വീസ് നടത്തുകയാണ്.
