മുംബൈ: കോവിഡിനെ അതിജീവിച്ചവര്ക്കു ഭീഷണിയായി ബ്ലാക്ക് ഫംഗസ്. മഹാരാഷ്ട്രയില് മാത്രം എട്ട് പേര്ക്കു കാഴ്ച നഷ്ടമായി. ഗുജറാത്തിലും ഡല്ഹിയിലും ബ്ലാക് ഫംഗസിന്റെ സാന്നിധ്യം തിരിച്ചറിഞ്ഞിട്ടുണ്ട്. മഹാരാഷ്ട്രയില് ഈ രോഗം ബാധിച്ചു 200 പേര് ചികിത്സയിലാണെന്നു ഡി.എം.ഇ.ആര്. ഡയറക്ടര് ഡോ. തത്യാറാവു ലഹാനെ അറിയിച്ചു.
ബ്ലാക് ഫംഗസ്
മ്യൂകോര് എന്നറിയപ്പെടുന്ന ബ്ലാക് ഫംഗസാണു മ്യൂകോര്മൈകോസിസ് എന്ന രോഗത്തിനു കാരണമാകുന്നത്. ശരീരത്തിന്റെ പ്രതിരോധശേഷി ദുര്ബലമായ അവസ്ഥയിലാണ് മ്യൂകോര് ആക്രമിക്കുന്നത്. നനഞ്ഞ പ്രതലങ്ങളില് മ്യൂകോറിന്റെ സാന്നിധ്യമുണ്ട്. കോവിഡ് വൈറസ് ശരീരത്തിന്റെ പ്രതിരോധശേഷി കുറയ്ക്കുന്നതാണു മ്യൂകോര്മൈകോസിസിനു വഴിവയ്ക്കുന്നത്.
കോവിഡ് ഭേദമായാലും ഫംഗസ് ഉള്ളില്കടന്നാല് അതിവേഗമാകും പ്രവര്ത്തനം. ഇതു തലച്ചോറില് പ്രവേശിച്ചാല് മരണത്തിനുവരെ കാരണാകും. രോഗിയെ രക്ഷിക്കാന് ചിലപ്പോള് ഒരു കണ്ണുനീക്കം ചെയ്യേണ്ടിവരും. പ്രതിരോധശേഷി കുറഞ്ഞവര്, പ്രമേഹ രോഗികര്, അവയവമാറ്റം നടത്തിയവര് എന്നിവരിലാണ് രോഗം കൂടുതലായി ബാധിക്കുന്നതെന്നും ഡോ. തത്യാറാവു ലഹാനെ അറിയിച്ചു.
കണ്ണുവേദന, മുഖ വീക്കം, തലവേദന, പനി, മൂക്കടപ്പ്, കാഴ്ചക്കുറവ് എന്നിവയാണ് പ്രധാന ലക്ഷണങ്ങള്. കോവിഡ് വ്യാപനത്തിന്റെ ആദ്യഘട്ടത്തിലും മ്യൂകോര്മൈകോസിസ് ബാധ കണ്ടെത്തിയിരുന്നു. എന്നാല്, രോഗികളുടെ എണ്ണം താരതമ്യേന കുറവായിരുന്നു. ഈ രോഗം ഇതുവരെ അപൂര്വമായിരുന്നു. ഇപ്പോള് പ്രതിദിനം രണ്ടോ മൂന്നോ പേരില് രോഗബാധ സ്ഥിരീകരിക്കുന്നുണ്ടെന്നു മുംബൈ കെ.ഇ.എം. ആശുപത്രിയിലെ ഡോ. ഹെതല് മര്ഫാതിയ പറഞ്ഞു. ഈ രോഗത്തിനു ചികിത്സ ചെലവേറിയതാണ്. 9,000 രൂപ വിലവരുന്ന മരുന്ന് 21 ദിവസത്തോളം കുത്തിവയ്ക്കേണ്ടിവരും.
ഡോക്ടറുടെ അനുഭവം
ശനിയാഴ്ചയാണു മുംബൈയില് സര്ജനായ ഡോ. അക്ഷയ് നായര്ക്കു മുന്നില് മ്യൂകോര്മൈകോസിസ് രോഗിയെത്തിയത്. 25 വയസുള്ള യുവതി കോവിഡില്നിന്നു രക്ഷപ്പെട്ടിട്ട് മൂന്നാഴ്ചയേ ആയിട്ടുള്ളൂ. പ്രമേഹ രോഗികൂടിയാണ് അവര്. ആദ്യം മൂക്കില്നിന്നു മ്യൂകോര് ബാധിച്ച കലകളെ നീക്കം ചെയ്തു. പക്ഷേ, ഫംഗസ് കണ്ണുകളില്വരെ എത്തിയിരുന്നു.
ഒരു കണ്ണുകൂടി നീക്കം ചെയ്തശേഷമാണു മൂന്ന് മണിക്കൂര് നീണ്ട ശസ്ത്രക്രിയ അവസാനിച്ചത്. മ്യൂകോര് നമുക്കു ചുറ്റുമുണ്ടെന്നാണു ഡോ. അക്ഷയ് നായര് പറയുന്നത്. മണ്ണില്, ചിഞ്ഞ പഴങ്ങളില് എല്ലാം ഈ ഫംഗസുണ്ട്. ആരോഗ്യമുള്ള വ്യക്തിയുടെ മൂക്കുകളിലും മ്യൂകോര് സാന്നിധ്യമുണ്ടാകാം. എന്നാല്, കോവിഡ് ബാധിച്ച പ്രതിരോധ സംവിധാനം തകര്ന്ന വ്യക്തികളിലാകും ഈ ഫംഗസ് അപകടകാരിയാകുക. സാധാരണ കോവിഡ് മുക്തിനേടി 12 മുതല് 15 ദിവസത്തിനുള്ളിലാകും മ്യൂകോര്മൈകോസിസ് തിരിച്ചറിയുകയെന്ന് അദ്ദേഹം പറഞ്ഞു.
