കൊല്ക്കൊത്ത: കോവിഡ് സാഹചര്യം വിലയിരുത്താന് പ്രധാനമന്ത്രി നരേന്ദ്ര മോദി വിളിച്ച യോഗത്തില് മുഖ്യമന്ത്രിമാര്ക്ക് സംസാരിക്കാന് അവസരം നല്കാത്തതില് പ്രതിഷേധമുയര്ത്തി പശ്ചിമ ബംഗാള് മുഖ്യമന്ത്രി മമത ബാനര്ജി. മുഖ്യമന്ത്രിമാര് പാവകണക്കിന് ഇരിക്കുകയാണെന്നും മമത വിമര്ശിച്ചു. പത്ത് സംസ്ഥാനങ്ങളിലെ ജില്ലാ കലക്ടര്മാരുമായാണ് മോദി ഇന്ന് വീഡിയോ കോണ്ഫറന്സ് വഴി സംസാരിച്ചത്. മുഖ്യമന്ത്രിമാരേയും യോഗത്തിലേക്ക് ക്ഷണിച്ചിരുന്നു. ബംഗാളില് നിന്നുള്ള ജില്ലാ കലക്ടര്മാര് യോഗത്തില് പങ്കെടുത്തിരുന്നില്ല. പകരം മമത ബാനര്ജി തന്നെയാണ് പങ്കെടുത്തത്.
സംസ്ഥാനങ്ങളിലെ മരുന്നുകളുടെയും വാാക്സിന്റേയും റെംഡെസീവിര്, ഓക്സിജന് സാഹചര്യമൊന്നും മോദി ഞങ്ങളോട് ചോദിച്ചില്ല. ഔദ്യോഗികമായി ക്ഷണിക്കപ്പെട്ട മുഖ്യമന്ത്രിമാര്ക്കാര്ക്കും സംസാരിക്കാന് അവസരം നല്കാത്തത് മോശമായാണ് തനിക്ക് തോന്നിയത്. അപമാനിക്കപ്പെട്ടവരായാണ് ഞങ്ങള് മുഖ്യമന്ത്രിമാര്ക്ക് തോന്നിയത്. യോഗം പൂര്ണ്ണ പരാജയമാണെന്നും മമത പ്രതികരിച്ചു. വീഡിയോ കോണ്ഫറന്സ് അവസാനിച്ചതിനു തൊട്ടുപിന്നാലെയായിരുന്നു മമതയുടെ പ്രതികരണം.
മോദിക്ക് താല്പര്യമുള്ള ചില മുഖ്യമന്ത്രിമാരേ സംസാരിക്കാന് അനുവദിച്ചു. കൊവിഡ് സാഹചര്യം മെച്ചപ്പെട്ടുവെന്ന് മോദി പറയുന്നു. എന്നാല് എങ്ങനെയാണ് ദിനംപ്രതി നിരവധി ആളുകള് മരിച്ചുവീഴുന്നതെന്നും മമത ചോദിക്കുന്നു.
കേന്ദ്രം ഇപ്പോഴും രാഷ്ട്രീയം കളിക്കുകയാണ്. ബംഗാളിനോടുള്ള അവരുടെ ചിറ്റമ്മ നയം ദൗര്ഭാഗ്യകരമാണ്. അവരെ ചോദ്യം ചെയ്യാന് താന് ആഗ്രഹിക്കുകയാണ്. യു.പിയിലേക്കും ബിഹാറിലേക്കും എത്ര കേന്ദ്ര സംഘങ്ങള് പോയി. എന്നിട്ടും ഗംഗയിലൂടെ മൃതദേഹങ്ങള് ഒഴുകി നടക്കുകയാണ-മമത വിമര്ശിച്ചു.
