ന്യുഡല്ഹി: കോവിഡ് വാക്സിന്റെ ഉപയോഗത്തെ തുടര്ന്നുണ്ടാകുന്ന ആരോഗ്യപ്രശ്നങ്ങളില് നഷ്ടപരിഹാരം ഈടാക്കുന്നതും നിയമപ്രശ്നം നേരിടേണ്ടിവരുന്നതും ഒഴിവാക്കണമെന്ന് കോവിഷീല്ഡ് നിര്മ്മാതാക്കളായ സിറം ഇന്സ്റ്റിറ്റ്യൂട്ടും കോവാക്സിന് നിര്മ്മാതാക്കളായ ഭാരത് ബയോടെകും. നേരത്തെ ഫൈസര്, മൊഡേണ വാക്സിനുകളും ഈ ആവശ്യം കേന്ദ്രസര്ക്കാരിനോട് ഉന്നയിച്ചിരുന്നു.
തദ്ദേശീയമോ വിദേശീയമോ എന്ന് പരിഗണിക്കാതെ എല്ലാ വാക്സിന് നിര്മ്മാതാക്കള്ക്കും ഈ പരിരക്ഷ നല്കണമെന്നാണ് ആവശ്യം. വിദേശ കമ്പനികള്ക്ക് നല്കുകയാണെങ്കില് സിറം ഇന്സ്റ്റിറ്റ്യൂട്ടിന് മാത്രമല്ല, എല്ലാ വാക്സിന് കമ്പനികള്ക്കും നല്കണമെന്ന് സിറം ആവശ്യപ്പെടുന്നു. കേന്ദ്രസര്ക്കാര് ഇതുവരെ ഒരു കമ്പനിക്കും ഇത്തരമൊരു ഇളവ് നല്കിയിട്ടില്ല.
ഫൈസറിനും മോഡേണയ്ക്കും ഇന്ത്യയില് വിതരണത്തിന് അനുമതി എളുപ്പത്തിലാക്കാന് ഈ നിയമപ്രശ്നങ്ങള് ഒഴിവാക്കി കൊടുത്തേക്കുമെന്ന് ശ്രുതിയുണ്ടായിരുന്നു. എന്നാല് അത്തരമൊരു വിഷയമേയില്ലെന്നായിരുന്നു കേന്ദ്രസര്ക്കാരിലെ ഉന്നതര് പറയുന്നത്.
അതേസമയം, തദ്ദേശീയമായി നിര്മ്മിച്ച ഒരു വാക്സിന് കൂടി രാജ്യത്ത് ലഭ്യമാകാന് പോകുന്നു. ഹൈദരാബാദില് നിര്മ്മിക്കുന്ന ബയോളജിക്കല് ഇ വാക്സിന് ആണ് ഉടന് ലഭ്യമാകുക. 30 കോടി ഡോസ് വാക്സിന് സംഭരിക്കാനാണ് കേന്ദ്രസര്ക്കാരിന്റെ തീരുമാനം. ഇതിനായി 1500 കോടി രുപ നിര്മ്മാതാക്കള്ക്ക് കൈമാറും. വാക്സിന്റെ ആദ്യ രണ്ട് ക്ലിനിക്കല് പരീക്ഷണങ്ങളും വിജയകരമായ സാഹചര്യത്തില് മൂന്നാമത്തെ പരീക്ഷണം തുടരുകയാണ്. ആര്ബിഡി പ്രോട്ടീന് സബ് യുണിറ്റ് വാക്സിന് ആണിത്. ഏതാനും മാസങ്ങള്ക്കുള്ളില് വാക്സിന് ലഭ്യമായേക്കുമെന്ന് കേന്ദ്ര ആരോഗ്യ മന്ത്രാലയം അറിയിച്ചു.
അതിനിടെ, കുട്ടികളിലെ വാക്സിന് പരീക്ഷണത്തിന് ഇന്ന് തുടക്കമാകും. 2-18 വയസ്സിനിടെയുള്ള കുട്ടികളിലാണ് പരീക്ഷണം. കോവിഡിന്റെ മൂന്നാം തരംഗം കുട്ടികളെയായിരിക്കും തീവ്രമായി ബാധിക്കുക എന്ന ആശങ്കയാണ് കുട്ടികളില് വാക്സിനേഷന് ഊര്ജിതമാക്കാനുള്ള ശ്രമം തുടങ്ങിയത്.
