ന്യൂഡല്ഹി: റഷ്യന് നിര്മ്മിത സ്പുട്നിക് വാക്സിന് വിതരണം ചെയ്യാമെന്നറിയിച്ച മാള്ട്ടയിലെ ഫാര്മ റെഗുലേറ്ററി സര്വീസസ് ലിമിറ്റഡ് എന്ന കമ്പനിയെക്കുറിച്ചുള്ള വിശദ വിവരം തേടി ഹരിയാണ സര്ക്കാര് കേന്ദ്രത്തിന് കത്തെഴുതി. വാക്സിന് വിതരണത്തിനായി ഹരിയാന ആഗോളതലത്തില് ടെന്ഡര് ക്ഷണിച്ചതിനെ തുടര്ന്നായിരുന്നു പ്രസ്തുത കമ്പനിയുടെ പ്രതികരണം.
കോവിഡ്-19 വാക്സിന് വിതരണത്തിനായി ആഗോള ടെന്ഡര് ക്ഷണിച്ചതായും തുടര്ന്ന് മാള്ട്ടയിലെ ഫാര്മ റെഗുലേറ്ററി സര്വീസസ് ലിമിറ്റഡ് എന്ന കമ്പനി താത്പര്യം പ്രകടിപ്പിച്ചതായും കത്തില് പറയുന്നു. ഈ രംഗത്തെ മുന്കാലപരിചയത്തെ കുറിച്ചും കമ്പനിയുടെ പ്രവര്ത്തനങ്ങളിലെ സത്യസന്ധതയെ കുറിച്ചും വിലയിരുത്താന് സഹായിക്കണമെന്നാണ് കത്തില് ആവശ്യപ്പെട്ടിട്ടുള്ളത്. കമ്പനി താത്പര്യമറിയിച്ചിട്ടുണ്ടെങ്കിലും തുടര്നടപടികള് സ്വീകരിക്കുന്നതിന് മുമ്പ് എല്ലാ കാര്യങ്ങളും കൃത്യമായി പരിശോധിക്കേണ്ടതുണ്ടെന്ന് സംസ്ഥാന ആരോഗ്യവകുപ്പ് അഡീഷണല് ചീഫ് സെക്രട്ടറി രാജീവ് അറോറ അറിയിച്ചു.
ടെന്ഡര് അനുവദിച്ചാല് മുപ്പത് ദിവസത്തിനുള്ളില് ആദ്യ ബാച്ചായി അഞ്ച് ലക്ഷം ഡോസ് സ്പുട്നിക് വാക്സിന് കമ്പനി വിതരണം ചെയ്യുമെന്നും തുടര്ന്ന് ഓരോ 20 ദിവസക്കാലയളവില് പത്ത് ലക്ഷം ഡോസ് വീതം വിതരണം ചെയ്യുമെന്ന് കമ്പനി അറിയിച്ചതായി ഹരിയാണ സര്ക്കാര് പ്രസ്താവനയില് വ്യക്തമാക്കി.
