ന്യൂഡല്ഹി: കള്ളനോട്ടിനും കള്ളപ്പണത്തിനും എതിരേയുള്ള നീക്കങ്ങളുടെ ഭാഗമായി 500, 1000 കറന്സിനോട്ടുകള് അസാധുവാക്കാനുള്ള അപ്രതീക്ഷിത തീരുമാനം പ്രധാനമന്ത്രി പ്രഖ്യാപിച്ചത് അതീവ നാടകീയമായിട്ടായിരുന്നെന്ന് റിപ്പോര്ട്ട്. ധനമന്ത്രി അരുണ് ജെയ്റ്റ്ലി, റിസര്വ് ബാങ്ക് ഗവര്ണര് എന്നിവര് ഒഴികെ ആരുമായും കാര്യം ചര്ച്ച ചെയ്യാതിരുന്ന പ്രധാനമന്ത്രി സൈനിക തലവന്മാരുമായി കൂടിക്കാഴ്ച നടത്തിയ ശേഷം അധികം താമസിയാതെ തന്നെ പ്രഖ്യാപനം നടത്തുകയൂം ചെയ്തു.
വിവരം പുറത്ത് പോകാതിരിക്കാന് അങ്ങേയറ്റം ശ്രദ്ധ പുലര്ത്തി രാത്രി എട്ടു മണിയോടെ പ്രഖ്യാപനം നടത്തുകയായിരുന്നു. മണിക്കൂറുകള്ക്കകം 500,1000 നോട്ടുകള് പിന്വലിക്കാനുള്ള നീക്കം അതീരഹസ്യമായിട്ടായിരുന്നു കേന്ദ്ര സര്ക്കാര് സൂക്ഷിച്ചത്. ഇന്ത്യാ പാകിസ്താന് സംഘര്ഷ സാധ്യത നിലനില്ക്കുമ്പോള് പ്രധാനമന്ത്രി അപ്രതീക്ഷിതമായി രാഷ്ട്രത്തെ അഭിസംബോധന ചെയ്യാന് ഒരുങ്ങിയപ്പോള് ഏവരും പ്രതീക്ഷിച്ചത് യുദ്ധമായിരുന്നു. എന്നാല് എല്ലാവരേയും ഞെട്ടിച്ചുകൊണ്ട് മറ്റൊരു പ്രഖ്യാപനം നടത്തുകയായിരുന്നു.
ചൊവ്വാഴ്ച രാത്രിയിലാണ് പ്രഖ്യാപനം വന്നത്. എന്നാല് ഇതിന് തൊട്ടുമുമ്പായി അദ്ദേഹം സൈനിക തലവന്മാരുമായി കൂടിക്കാഴ്ച നടത്തുന്ന ദൃശ്യങ്ങള് കൂടി പുറത്തു വന്നിരുന്നു. അതിര്ത്തിയില് തുടര്ച്ചയായ വെടിനിര്ത്തലുകളും ആക്രമണങ്ങളും സൈനിക തലവന്മാരും സുരക്ഷാ ഉപദേഷ്ടാക്കളുമായുള്ള മോഡിയുടെ കൂടിക്കാഴ്ചയുമെല്ലാം യുദ്ധ പ്രഖ്യാപനമെന്ന തോന്നലിലേക്ക് നയിക്കുമ്പോഴായിരുന്നു കറന്സിനോട്ടുകളുമായി ബന്ധപ്പെട്ട പ്രഖ്യാപനം വന്നത്.
കര്ഷകരുടെയും പാവപ്പെട്ടവരുടേയും കാര്യം പറഞ്ഞു തുടങ്ങിയ മോഡി പിന്നീട് കള്ളപ്പണം, ഭീകരത, അതിലേക്ക് ഒഴുകുന്ന കള്ളനോട്ടുകള്, അതിര്ത്തി കടന്ന് വരുന്ന വ്യാജ കറന്സികള് തുടങ്ങിയവയെയെല്ലാം പരാമര്ശിച്ച ശേഷം ഒടുവില് നാടകീയമായി കാതലായ വിഷയം പ്രഖ്യാപിക്കുകയായിരുന്നു. കള്ളപ്പണവും കള്ളനോട്ടും തീവ്രവാദത്തിന് എത്രമാത്രം ഉപയോഗിക്കപ്പെടുന്നു എന്നതിന്റെ പശ്ചാത്തലത്തിലാണ് നിരോധനം കൊണ്ടുവരുന്നതെന്നും പറഞ്ഞു. ഭീകരതയുടെ സാമ്പത്തിക സ്രോതസ് അടയ്ക്കുന്നതിനൊപ്പം വിദേശത്ത് പണം സൂക്ഷിച്ചിരിക്കുന്നവര്ക്കും തീരുമാനം താല്ക്കാലിക തിരിച്ചടി നല്കും. രാജ്യം തൊട്ടടുത്ത് നേരിടാന് പോകുന്ന തെരഞ്ഞെടുപ്പിലും തീരുമാനം പ്രതിഫലനം സൃഷ്ടിക്കും. തെരഞ്ഞെടുപ്പ് പ്രചരണങ്ങളില് കള്ളപ്പണം ഒഴുക്കുന്ന പ്രവണത കുറയും.
അപ്രതീക്ഷിതമായ ഈ നീക്കം രാജ്യത്ത് അരക്ഷിതാവസ്ഥ സൃഷ്ടിക്കാന് കള്ളനോട്ട് വ്യാപകമായി പ്രചരിപ്പിക്കുന്ന പാകിസ്താനും തീവ്രവാദികള്ക്കും ശക്തമായ തിരിച്ചടിയായി മാറിയിട്ടുണ്ട്. പാക് ചാര സംഘടനയായ ഐഎസ്ഐ ഇന്ത്യയിലേക്ക് വന് തോതില് കള്ളനോട്ട് ഒഴുക്കുന്നതായി മൂന്ന് വര്ഷം മുമ്പ് എന്ഐഎ കണ്ടെത്തിയിരുന്നു. വാട്ടര്മാര്ക്ക് ഉള്പ്പെടെയുള്ള സുരക്ഷാ സംവിധാനങ്ങളെ വെല്ലുന്ന രീതിയില് സൃഷ്ടിക്കപ്പെട്ടവയായിരുന്നു ഇത്. ഇന്ത്യന് സമ്പദ് വ്യവസ്ഥയെ തന്നെ വെല്ലുവിളിക്കുന്ന രീതിയിലേക്ക് കള്ളനോട്ട് വളരുകയും ചെയ്തിരുന്നു. 2002 നും 2011 നും ഇടയില് 400 ബില്യണ് ഡോളറിന്റെ നഷ്ടമാണ് ഇന്ത്യ നേരിട്ടത്്. അതേസമയം യാതൊരു മുന്നറിയിപ്പും കൂടാതെയുള്ള ഈ പ്രഖ്യാപനം രാജ്യത്തെ പാവപ്പെട്ടവരെ സംബന്ധിച്ചിടത്തോളം എത്രമാത്രം പ്രതിസന്ധിയാകുന്നു എന്ന് അറിയാന് കിടക്കുന്നതേയുള്ളൂ.
