കൊച്ചി : തുടര്ച്ചയായി രണ്ടു വര്ഷം കേരളത്തിലുണ്ടായ പ്രളയത്തിനു കാരണം ലഘുമേഘവിസ്ഫോടനമെന്നു പഠനറിപ്പോര്ട്ട്. 2018, 2019 വര്ഷങ്ങളിലുണ്ടായ പ്രളയത്തെക്കുറിച്ചു കുസാറ്റ്, പുനെ ഐ.ഐ.ടി.എം., മിയാമി സര്വകലാശാല, കേന്ദ്ര കാലാവസ്ഥാ വകുപ്പ് എന്നിവ സംയുക്തമായി നടത്തിയ പഠനത്തിലാണ് ഈ കണ്ടെത്തല്.
പ്രധാന കണ്ടെത്തലുകള്:
2018, 19 മണ്സൂണ് സീസണുകളില് ആകെ ലഭിച്ചത് ഏറെക്കുറെ തുല്യമായ മഴയായിരുന്നെങ്കിലും മഴയുടെ വിന്യാസം വ്യത്യസ്തമായിരുന്നു. 2018 ല് അധികംപെയ്ത വേനല് മഴയും മേയ് 29 മുതല് തുടങ്ങിയ ശക്തമായ കാലവര്ഷവും ചേര്ന്നതോടെ പ്രളയത്തിലേക്കു വഴിവയ്ക്കാവുന്ന സാഹചര്യം ഉടലെടുത്തു. രണ്ടു വര്ഷങ്ങളിലും ഓഗസ്റ്റിലായിരുന്നു പ്രളയം. 2018 ല് ഓഗസ്റ്റ് 15 മുതല് 18 വരെ തോരാതെ പെയ്ത മഴയിലും 2019 ല് ഓഗസ്റ്റ് 7 മുതല് 10 വരെ പൊടുന്നനെ പെയ്ത പേമാരിയിലും പ്രളയമുണ്ടായി.
2019 ഓഗസ്റ്റ് 8 നു വയനാട്, കോഴിക്കോട്, മലപ്പുറം, പാലക്കാട്, എറണാകുളം, ഇടുക്കി എന്നീ ജില്ലകളില് പെയ്ത മഴയ്ക്ക് ഉത്തരേന്ത്യയില് പലപ്പോഴും സംഭവിക്കുന്ന മേഘസ്ഫോടനത്തിന്റെ സ്വഭാവമായിരുന്നു. എന്നാലിതിന് തീവ്രത കുറവായിരുന്നു. പക്ഷേ അസാധാരണമായി കൂടുതല് പ്രദേശങ്ങളെ ബാധിച്ച മേഘവിസ്ഫോടനം തന്നെ ആയിരുന്നു. അതിനെ "മീസോസ്കൈല് മിനി ക്ലൗഡ് ബഴ്സ്റ്റ്" (ലഘു മേഘ വിസ്ഫോടനം)എന്ന് വിളിക്കാം.
രണ്ടു മണിക്കൂറിനുള്ളില് 5 സെ.മീ. മുകളില് തീവ്രതയില് പെയ്യുന്ന മഴയെ മിനി ക്ലൗഡ് ബഴ്സ്റ്റ് എന്ന് വിളിക്കും. സാധാരണയായി മേഘവിസ്ഫോടനംഒരു ചെറിയ പ്രദേശത്ത് (1520 സ്ക്വയര് കിലോമീറ്റര്) മാത്രമാണു ബാധിക്കുക. കേരളത്തിലാകട്ടെ കോഴിക്കോട്, മലപ്പുറം, ഇടുക്കി ജില്ലകളുടെ ഒട്ടേറെ വിസ്തൃതമായ പ്രദേശത്താണുണ്ടായത്.
2019 ഓഗസ്റ്റ് 8 ന്, 2 മണിക്കൂറിനുള്ളില് 5 മുതല് 6 സെന്റീ മീറ്റര് എന്നയളവില് തുടര്ച്ചയായി മഴ രേഖപ്പെടുത്തി. 2018 ലെ പ്രളയ ദിവസങ്ങളില് ഏറ്റവും ശക്തമായി മഴ പെയ്ത ഓഗസ്റ്റ് 15 ന്, മഴയുടെ ശക്തി 2019 ഓഗസ്റ്റ് 8 നെ അപേക്ഷിച്ച് നന്നേ കുറവായിരുന്നു. 2 മണിക്കൂറില് 4 സെന്റീ മീറ്ററില് കൂടുതല് മഴ അന്ന് എവിടെയും അനുഭവപ്പെട്ടിരുന്നില്ല.
2019 ലെ പ്രളയമഴയുടെ സ്വഭാവം സംസ്ഥാനത്തെ വലിയതോതില് ആശങ്കപ്പെടുത്തുന്നതാണ്. കാലാവസ്ഥാ മാറ്റത്തിന്റെ സൂചനകള് അതിലുണ്ട്. 2018 ലെ പ്രളയം, കാലവര്ഷത്തിന്റെ ആരംഭം മുതല് പതിയെ എത്തിയതായിരുന്നു. 2019 ല് അത് പൊടുന്നനെ പെയ്തിറങ്ങി മുക്കികളഞ്ഞു.
2019 ലെ പ്രളയ മഴസമയത്ത് അസാധാരണമാം വിധം ഇടിമിന്നലോടെ മഴ പെയ്തിരുന്നു. കുമുലോ നിംബസ് മേഘങ്ങളായിരുന്നു (കൂമ്പാര മേഘങ്ങള്) ഇതിനുകാരണം. അറബിക്കടലിലെ ഉപരിതല താപനില കൂടിയതോടെ ബാഷ്പീകരണതോത് വര്ധിച്ചാണ് കുമുലോ നിംബസ് മേഘങ്ങള് കൂടുതലായി രൂപപ്പെട്ടത്. താരതമ്യേന ഉയരം കുറഞ്ഞ (ഏകദേശം 8 കിലോമീറ്ററിലും താഴെ) നിമ്പോ സ്ട്രാറ്റസ് മേഘങ്ങളില്നിന്നു തോരാതെ കിട്ടുന്ന ശക്തി കുറഞ്ഞ മഴയായിരുന്നു കാലവര്ഷത്തിന്റെ മുന് കാല സ്വഭാവം. എന്നാല്, 2019 ല് കുമുലോ നിംബസ് മേഘങ്ങള് രൂപപ്പെട്ടത് അതീതീവ്രമഴയ്ക്കു കാരണമായി.
2013 മുതല് 2017 വരെയുള്ള കാലയളവില് ഇന്ത്യയുടെ പശ്ചിമ തീരത്തെ മഴയുടെ സ്വഭാവത്തില് മാറ്റമുണ്ടായി. കൊങ്കണ് കാടുകളും മുംബൈ തീരവും പെരുമഴയ്ക്ക് എക്കാലവും പേരുകേട്ടതാണ്. എന്നാല് 2013 മുതല് 2017 വരെയുള്ള കാലയളവില് കൊങ്കണിലെ തീവ്രമഴ കുറേക്കൂടി തെക്കോട്ട് മാറി പാലക്കാടിനു വടക്കുവരെ വ്യാപിച്ചു. ഇത് ആശങ്കപ്പെടുത്തുന്നതാണ്.
കുസാറ്റിലെ റഡാര് കേന്ദ്രം ഡയറക്ടര് ഡോ. എസ്. അഭിലാഷിന്റെ നേതൃത്വത്തില് നടത്തിയ പഠനത്തില് ഡോ. പി. വിജയ്കുമാര്, ശ്രീനാഥ് എ.വി, ആതിര യു, പ്രഫ. കെ.മോഹന്കുമാര്, സെന്റര് ഫോര് സയന്സ് ഇന് സൊസൈറ്റി ഡയറക്ടര് പ്രഫ. ചക്രപാണി, കേന്ദ്ര കാലാവസ്ഥാ വകുപ്പിലെ ശാസ്ത്രജ്ഞരായ നിയാസ്, ശ്രീജിത്ത് പുനെ ഐ.ഐ.ടി.എമ്മിലെ ഡോ. സഹായി, മിയാമി യൂണിവേഴ്സിറ്റിയിലെ പ്രഫ. ബ്രയാന് മേപ്സ് തുടങ്ങിയവര് പങ്കാളികളായിരുന്നു.
ബൈജു ഭാസി
