ന്യുഡല്ഹി: കേന്ദ്രസര്ക്കാരിന്റെ പുതുക്കിയ കാര്ഷിക നിയമങ്ങളില് പ്രതിഷേധിച്ച് കര്ഷകര് നടത്തി വരുന്ന സമരം വീണ്ടും ചൂടുപിടിക്കുന്നു. സമരവേദി ജന്ദര് മന്ദറിലേക്ക് മാറ്റാന് കര്ഷകര് തീരുമാനിച്ചു. ജന്ദര് മന്ദറിലേക്ക് ബസുകളിലായി കര്ഷകര് എത്തിക്കൊണ്ടിരിക്കുകയാണ്.
ഭാരതീയ കിസാന് യൂണിയന് നേതാവ് രാകേഷ് തികായത്ത് ജന്ദര് മന്ദറിലെത്തി. കര്ഷകര് മൈതാനത്ത് പാര്ലമെന്റ് സമ്മേളനം നടത്തുമെന്ന് തികായത് നേരത്തെ പറഞ്ഞിരുന്നു. പാര്ലമെന്റിന്റെ വര്ഷകാല സമ്മേളനം നടക്കുന്ന സാഹചര്യത്തില് കര്ഷക സമരത്തെ നേരിടാന് സിംഗു, തിക്രി അതിര്ത്തികളില് വന് പോലീസ് സേനയെ ആണ് വിന്യസിച്ചിരിക്കുന്നത്.
രാവിലെ 11 മണുതല് വൈകിട്ട് അഞ്ച് വരെയാണ് സമരം ചെയ്യാന് കര്ഷകര്ക്ക് അനുമതി നല്കിയിരിക്കുന്നത്. സംയുക്ത കിസാര് മോര്ച്ചയില് നിന്ന് 200 പേര്ക്കും കിസാന് മസ്ദൂര് സംഘര്ഷ് കമ്മിറ്റിയില് നിന്ന് 11 പേര്ക്കുമാണ് പ്രതിഷേധിക്കാന് അനുമതി. കര്ഷകരാണെന്നതിന്റെ തിരിച്ചറിയല് കാര്ഡ് പരിശോധിച്ച ശേഷമാണ് പ്രതിഷേധക്കാരെ പോലീസ് അതിര്ത്തിയില് നിന്ന് കടത്തിവിടുന്നത്.
വിവാദ കാര്ഷിക നിയമങ്ങളില് പ്രതിഷേധിച്ച് കഴിഞ്ഞ വര്ഷം നവംബര് 26 മുതല് കര്ഷകര് ഡല്ഹി അതിര്ത്തികളില് സമരം തുടരുകയാണ്. ഇതിനകം തന്നെ കേന്ദ്രവും കര്ഷകരും തമ്മില് നിരവധി തവണ ചര്ച്ചകള് നടന്നുവെങ്കിലും ഇരുകൂട്ടരും വിട്ടുവീഴ്ചയ്ക്ക് തയ്യാറാകാത്തതിനാല് ഒത്തുതീര്പ്പില് എത്തിയില്ല.
അതിനിടെ, കര്ഷക സമരത്തിന് പിന്തുണയുമായി രാഹുല് ഗാന്ധിയുടെ നേതൃത്വത്തില് കോണ്ഗ്രസ് എം.പിമാര് പാര്ലമെന്റ് വളപ്പില് പ്രതിഷേധിച്ചു. പഞ്ചാബില് നിന്നുള്ള എം.പിമാരാണ് സമരത്തിന്റെ മുന്പന്തിയില് രാജ്യത്തെ രക്ഷിക്കൂ, കര്ഷകരെ രക്ഷിക്കൂ എന്നീ മുദ്രാവാക്യങ്ങളെഴുതിയ പ്ലക്കാര്ഡുകളുമായാണ് ഗാന്ധി പ്രതിമയ്ക്കു മുന്നില് പ്രതിഷേധിച്ചത്.
