പ്രമുഖ റിയാലിറ്റി ഷോയായ ബിഗ് ബോസിലൂടെ പ്രേക്ഷകരെ സാക്ഷിയാക്കി പ്രണയിച്ച് വിവാഹിതരായവരാണ് നടിയും അവതാരകയായ പേളി മാണിയും സീരിയല് നടന് ശ്രീനിഷ് അരവിന്ദും. ഇരുവരുടെയും വിവാഹശേഷമുള്ള വിശേഷങ്ങളും യാത്രകളും മകളുടെ വിശേഷങ്ങളുമൊക്കെ പേളി തന്റെ യൂട്യൂബ് ചാനലിലൂടെ ആരാധകര്ക്കായി പങ്കിടാറുണ്ട്. ഇപ്പോള് 2012 -ല് തന്റെ ജീവിതത്തില് നടന്ന വലിയൊരു അപകടത്തെ കുറിച്ച് പറയുകയാണ് പേളി.
2012 ഡിംസബര് വെളുപ്പിന് മൂന്ന് മണി. എനിക്കന്ന് 26 വയസ്. ഭയങ്കര അലമ്പായിരുന്ന പ്രായമായിരുന്നു അത്. ക്രിസ്മസ് ആഘോഷമൊക്കെ കഴിഞ്ഞ് പുതിയ കാറില് ഓവര്സ്പീഡില് പൊയ്ക്കൊണ്ടിരിക്കുമ്പോള് നിര്ത്തിയിട്ടിരുന്ന ഒരു ലോറിയില് ഞാന് ചെന്ന് ഇടിച്ചു. കാര് മുഴുവനും തകര്ന്നു പോയി. എന്നെ ആശുപത്രിയില് കൊണ്ടു പോയി. 18 സ്റ്റിച്ചായിരുന്നു. തലമുടിയൊക്കെ എടുത്ത് കളഞ്ഞിരുന്നു. എന്റെ മുഖം പോയെന്നാണ് അന്ന് കരുതിയത്. അതിന് ശേഷം 3-4 ദിവസം കഴിഞ്ഞപ്പോള് ന്യൂ ഇയര് ആണ്. 2013-ല് ഡ്രീംസ് ഹോട്ടലില് ന്യൂ ഇയര് ഇവന്റ് നടക്കുമ്പോള് അതിന്റെ തലയിലൊരു കെട്ടും കെട്ടി ഞാന് ആങ്കറിങ് ചെയ്തു.
എഴുന്നേല്ക്കാന് പോലും വയ്യാത്ത അവസ്ഥയിലായിരുന്നു. മുടിയിലും മുഖത്തുമെല്ലാം കുപ്പിച്ചില്ലായിരുന്നു. കൈകളില് ഇന്നും അതിന്റെ പാടുണ്ട്. ആ 4 ദിവസം ഡാഡിയും മമ്മിയുമാണ് എന്നെ നന്നായി സഹായിച്ചത്. അന്നു ഞാന് മനസിലാക്കിയ ഒരു സത്യമുണ്ട്. എന്റെ ഭയങ്കര ഫ്രണ്ട്സ് എന്നു ഞാന് കൊണ്ടു നടന്നിരുന്ന ഒരാളും എനിക്ക് അപകടം പറ്റിയ ശേഷം എന്റെ കൂടെ ഉണ്ടായിരുന്നില്ല. എന്റെ കൂടെ ആകെ ഉണ്ടായിരുന്നത് കൂട്ടുകാരുടെ കൂടെ ഞാന് അടിച്ചുപൊളിക്കാന് പോവുമ്പോള് ഞാന് വിഷമിപ്പിച്ചിരുന്ന എന്റെ അച്ഛനും അമ്മയും മാത്രമാണ്. എന്നെ കുറ്റപ്പെടുത്താതെ എന്റെ കൈ പിടിച്ച് കൂടെയിരുന്നത് അവര് മാത്രമാണ്.
എന്റെ ഫ്രണ്ട്സ് ആയിരുന്നു എനിക്ക് ലഹരി. എന്ത് നടന്നാലും കുടുംബവും മാതാപിതാക്കള്ക്കും മാത്രമായിരിക്കും നമ്മുടെ കൂടെയുണ്ടാവുമെന്ന് അന്നാണ് മനസിലായത്. പിന്നീട് പതുക്കെ ആവശ്യമില്ലാത്ത സൗഹൃദങ്ങളൊക്കെ ഞാന് കട്ട് ചെയ്തു. ആ നാലു ദിവസത്തിനുളളില് എങ്ങനെയാണ് ഞാന് റിക്കവറി ആയതെന്ന് എനിക്ക് തന്നെ അറിയില്ല.'' - പേളി പറയുന്നു.
