ബാലന്ദ്യോര് പുരസ്കാരം സ്വന്തമാക്കുക എന്നത് ഒരു ശരാശരി ഫുട്ബോള് താരത്തിന് ചിന്തിക്കാവുന്നതിലും അപ്പുറമാണ്. എന്നാല് ലയണല് മെസ്സിയ്ക്ക് ഇത് ഒരു കടമ്പയേയല്ല. ഏഴുതവണ ബാലണ്ദ്യോര് പുരസ്കാരം സ്വന്തമാക്കി സമാനതകളില്ലാത്ത നേട്ടത്തിലേക്ക് കാലെടുത്തുവെച്ച മെസ്സി ഫുട്ബോള് ലോകത്തെ വീണ്ടും വീണ്ടും അമ്പരപ്പിച്ചുകൊണ്ടിരിക്കുന്നു. അതുകൊണ്ടുതന്നെ മെസ്സിയെ മിശിഹയെന്ന് വിളിക്കുന്നതില് ഒട്ടും അതിശയോക്തിയില്ല. പാരീസിലെ ചടങ്ങില് റോബര്ട്ട് ലെവന്ഡോവ്സ്കിയുടെ അടുത്തിരിക്കുകയായിരുന്ന മെസ്സിയുടെ കണ്ണുകളില് ഭയമോ ആകാംക്ഷയോ ഒന്നും ഇല്ലായിരുന്നു. ശാന്തമായിരുന്നു ആ മുഖം. പുരസ്കാര വേദിയില് നിന്ന് ഫുട്ബോള് താരം ദിദിയര് ദ്രോഗ്ബ, ലയണല് മെസ്സിയെന്ന് ഉറക്കെ പ്രഖ്യാപിച്ചപ്പോള് വേദിയൊന്നടങ്കം കൈയടികളാല് നിറഞ്ഞു.
വേദിയിലെത്തിയ മെസ്സിയുടെ മുഖം പ്രസന്നമായി. അദ്ദേഹം ഇങ്ങനെ പറഞ്ഞു.' ലെവന്ഡോവ്സ്കി, നിങ്ങളുടെ എതിരാളിയായതില് എനിക്കേറെ അഭിമാനമുണ്ട്. കഴിഞ്ഞ വര്ഷത്തെ പുരസ്കാരത്തിന് നിങ്ങളായിരുന്നു അര്ഹന്'.
ഞെട്ടലോ സന്തോഷമോ ഒന്നും മുഖത്തുപ്രകടിപ്പിക്കാതെ മെസ്സി തിളങ്ങുന്ന കുപ്പായവുമിട്ട് വേദിയിലേക്ക് നടന്നുകയറി. കോവിഡ് മൂലം 2020ലെ ബാലണ്ദ്യോര് പുരസ്കാരങ്ങള് പ്രഖ്യാപിച്ചിരുന്നില്ല. 2019ല് മെസ്സി തന്നെയാണ് പുരസ്കാരം സ്വന്തമാക്കിയത്. 2009, 2010, 2011, 2012, 2015 വര്ഷങ്ങളിലും മെസ്സി ബാലണ്ദ്യോര് പുരസ്കാരം സ്വന്തമാക്കിയിരുന്നു. ഇത്തവണ 613 പോയന്റ് നേടിയാണ് മെസ്സി ഒന്നാം സ്ഥാനത്തെത്തിയത്. ലെവന്ഡോവ്സ്കിയ്ക്ക് 580 പോയിന്റാണ് ലഭിച്ചത്. പി.എസ്.ജിയ്ക്കും ബാഴ്സലോണയ്ക്കും അര്ജന്റീനയ്ക്കും വേണ്ടി മികച്ച പ്രകടനം പുറത്തെടുത്തതാണ് മെസ്സിയെ തുണച്ചത്. സീസണിന്റെ തുടക്കത്തില് മെസ്സിയുടെ ഫോമില്ലായ്മയില് സന്തോഷിച്ചവര്ക്കുള്ള ചുട്ട മറുപടിയാണ് താരത്തിന്റെ ഈ പുരസ്കാര നേട്ടം.
