തൊടുപുഴ : ആര്ക്കു മുന്നിലും ആത്മാഭിമാനം പണയംവയ്ക്കാന് പി.ടി തയാറായില്ല. മാധവ് ഗാഡ്ഗില് വിഷയത്തില് നാടുകടത്തിയിട്ടും ശവഘോഷയാത്ര നടത്തിയിട്ടും പി.ടി. കുലുങ്ങിയില്ല. തെരഞ്ഞെടുപ്പ് രാഷ്ട്രീയത്തില്നിന്ന് പുറത്താക്കപ്പെട്ടപ്പോഴും എഴുതിത്തള്ളിയവരോട് താന് കരുത്തോടെ ഇവിടെയുണ്ടെന്ന് വിളിച്ചുപറഞ്ഞു. കൊടുങ്കാറ്റിലും ഉരുള്പൊട്ടലിലും തളരാത്ത മലയോര കര്ഷകന്റെ നെഞ്ചുറപ്പോടെ...
2009- 2014 കാലഘട്ടത്തില് പി.ടി. തോമസ് ഇടുക്കി എം.പിയായിരിക്കെയാണ് പശ്ചിമഘട്ട സംരക്ഷണത്തിനായി കേന്ദ്രസര്ക്കാര് കസ്തൂരിരംഗന്, മാധവ് ഗാഡ്ഗില് റിപ്പോര്ട്ടുകള് കൊണ്ടുവരുന്നത്. യു.പി.എ സര്ക്കാര് കൊണ്ടുവന്ന റിപ്പോര്ട്ടായിട്ടും കോണ്ഗ്രസ് അടക്കമുള്ള രാഷ്ട്രീയപാര്ട്ടികളും കത്തോലിക്കാ സഭയും ഹൈറേഞ്ച് സംരക്ഷണ സമിതിയടക്കമുള്ള കര്ഷകസംഘടനകളും റിപ്പോര്ട്ടിനെ അടിമുടി എതിര്ത്തു. എല്ലാവരെയും ഞെട്ടിച്ച് റിപ്പോര്ട്ട് നടപ്പാക്കണമെന്നായി പി.ടി. കസ്തൂരിരംഗന് റിപ്പോര്ട്ടിനെ തള്ളിക്കളഞ്ഞ പി.ടി, മാധവ് ഗാഡ്ഗില് റിപ്പോര്ട്ടിനെയാണ് പിന്തുണച്ചത്. ഇതോടെ ഇടുക്കിയൊന്നാകെ പി.ടിക്കെതിരായി. അന്നത്തെ ഇടുക്കി ബിഷപ്പ് മാര് മാത്യു ആനിക്കുഴിക്കാട്ടില് പരസ്യമായി രംഗത്തെത്തി. പരിസ്ഥിതി തീവ്രവാദിയായി മുദ്രകുത്തി ഹൈറേഞ്ച് സംരക്ഷണസമിതി പ്രതീകാത്മകമായി പി.ടി. തോമസിന്റെ ശവഘോഷയാത്ര നടത്തി. സ്വന്തം പാര്ട്ടിയില്നിന്നു പോലും പി.ടിയെ ആരും പിന്തുണച്ചില്ല.
സഭയുടെ ശക്തമായ എതിര്പ്പിനെത്തുടര്ന്ന് 2014 ലോക്സഭാ തെരഞ്ഞെടുപ്പില് ഇടുക്കിയില് പി.ടിക്ക് സീറ്റ് നിഷേധിച്ചു. രണ്ട് തവണ എം.പിയായ ഫ്രാന്സിസ് ജോര്ജിനെ 75,000 വോട്ടിന്റെ ഭൂരിപക്ഷത്തില് പരാജയപ്പെടുത്തി മണ്ഡലം തിരിച്ചുപിടിച്ച നേതാവിനെയാണ് വി.എം സുധീരന് പ്രസിഡന്റായിരിക്കെ പാര്ട്ടി കൈയൊഴിഞ്ഞത്. പ്രചാരണത്തില്നിന്നു പോലും മാറ്റി നിര്ത്തപ്പെട്ടു. പകരം കാസര്ഗോഡ് മണ്ഡലത്തിന്റെ തെരഞ്ഞെടുപ്പ് ചുമതല നല്കി. ശിക്ഷ്യനായിരുന്ന ഡീന് കുര്യാക്കോസായിരുന്നു അന്ന് പി.ടിക്ക് പകരക്കാരന്. പി.ടി സ്ഥാനാര്ഥിയാകുമെന്നു പ്രതീക്ഷിച്ച് ഒരാള് കൊടുത്ത 25,000 രൂപ ഡീനിന് നല്കിയാണ് അന്ന് അദ്ദേഹം ഇടുക്കി വിട്ടത്. കാസര്ഗോഡ് ടി. സിദ്ധിഖിന്റെ തെരഞ്ഞെടുപ്പ് പ്രചാരണത്തിനായുള്ള യാത്രയ്ക്കിടെ ഹൃദയാഘാതമുണ്ടായി. അതോടെ പി.ടിയുടെ രാഷ്ട്രീയ ജീവിതം അവസാനിച്ചെന്ന് എല്ലാവരും വിധിയെഴുതി. എന്നാല്, അദ്ദേഹം ഉയര്ത്തെഴുന്നേറ്റു. തൃക്കാക്കരയില് നിന്ന് നിയമസഭയിലേക്കു ജയിച്ചതോടെ കരിയര് ഗ്രാഫ് ഉയര്ന്നു.
ഒരു ഘട്ടത്തില് തള്ളിപ്പറഞ്ഞെങ്കിലും ഇടുക്കിയുടെ മനസില് എന്നും പി.ടിക്ക് ഇടമുണ്ടായിരുന്നു. ഇത്തവണ സി.പി മാത്യു ഇടുക്കി ഡി.സി.സി പ്രസിഡന്റായപ്പോള് ചുമതല ഏല്പ്പിക്കാന് വര്ക്കിങ് പ്രസിഡന്റ് എന്ന നിലയില് എത്തിയത് പി.ടി തോമസായിരുന്നു. പ്രവര്ത്തകര് അന്ന് അദ്ദേഹത്തെ വരവേറ്റത് ഗ്രൂപ്പ് ഭേദമന്യേ.
എക്കാലവും ഇടുക്കിയിലെ കോണ്ഗ്രസിന്റെ അവസാന വാക്ക് കൂടിയായിരുന്നു പി.ടി. എ ഗ്രൂപ്പിനൊപ്പം ഉറച്ചുനിന്ന പി.ടി ഇടക്കാലത്ത് അകന്നതും ഗാഡ്ഗില് വിഷയത്തില് പിന്തുണ കിട്ടാതിരുന്നതിനാലാണ്.
വിനോദ് കണ്ണോളി
