ന്യുഡല്ഹി: കര്ണാടകയില് ചില കോളജുകളില് പെണ്കുട്ടികള് ഹിജാബ് ധരിക്കുന്നതിനെ വിലക്കിയ വിവാദത്തില് പ്രതികരണവുമായി കോണ്ഗ്രസ് നേതാവ് രാഹുല് ഗാന്ധി. ഹിജാബ് ധരിക്കാന് അനുവദിക്കില്ലെന്ന തീരുമാനം പുനഃപരിശോധിക്കണമെന്ന് കോളജ് അധികൃതരോട് ആവശ്യപ്പെട്ട രാഹുല്, നാം ഇന്ത്യയുടെ പെണ്മക്കളുടെ ഭാവി കൊള്ളയടിക്കുകയാണെന്നും' പറഞ്ഞു. സരസ്വതി പൂജ വേളയില് ട്വിറ്ററിലൂടെയാണ് രാഹുലിന്റെ പ്രതികരണം.
വിദ്യാര്ത്ഥികളുടെ ഹിജാബ് ഒഴിവാക്കാന് നിര്ദേശിക്കുക വഴി അവരുടെ ഭാവിയാണ് നാം കൊള്ളയടിക്കുക. സരസ്വതി ദേവി എല്ലാവര്ക്കും വിദ്യ നല്കുകയാണ് ചെയ്യുന്നത്. സരസ്വതി ദേവി ഒരിക്കലും വിവേചനം കാണിക്കുന്നില്ലെന്നും രാഹുല് ട്വീറ്റ് ചെയ്തു.
എന്നാല് കോണ്ഗ്രസ് നേതാവ് വിദ്യാഭ്യാസത്തെ വര്ഗീയവത്കരിക്കുകയാണെന്നാണ് ഇതിനോട് ബിജെപി കര്ണാടക നേതൃത്വം പ്രതികരിച്ചത്. വിദ്യാഭ്യാസത്തെ വര്ഗീയവത്കരിക്കുന്നത് വഴി കോണ്ഗ്രസ് സഹഉടമയായ രാഹുല് ഗാന്ധി ഒരിക്കല് കൂടി രാജ്യത്തിന്റെ ഭാവി അപകടത്തിലാക്കുന്നു. വിദ്യാഭ്യാസത്തിന് ഹിജാബ് അത്യന്താപേക്ഷിതമാണെങ്കില് എന്തുകൊണ്ട് കോണ്ഗ്രസ് ഭരിക്കുന്ന സംസ്ഥാനങ്ങളില് അത് നിര്ബന്ധമാക്കുന്നില്ല. കര്ണാടക ബി.ജെ.പി ട്വീറ്റ് ചെയ്തു.
ഉഡുപ്പിയിലെ കുന്ദാപുര് ഭദ്രാകര്സ് ആര്ട്സ് ആന്റ് സയന്സ ഡിഗ്രി കോളജിലാണ് പെണ്കുട്ടികള് ഹിജാബ് ധരിക്കുന്നത് നിരോധിച്ചത്. ഇതേതുടര്ന്ന് 40 ഓളം കുട്ടികള് ഇന്നലെയും ഗേറ്റിനു പുറത്ത് പ്രതിഷേധിച്ചിരുന്നു. ഹിജാബ് അഴിക്കാതെ കോളജില് പ്രവേശിക്കാന് അനുവദിക്കില്ലെന്നാണ് അധികൃതരുടെ നിലപാട്.
പെണ്കുട്ടികള്ക്ക് തലയില് സ്കാര്ഫ് ധരിക്കാന് അനുമതി നല്കിയിട്ടുണ്ടെന്നും അതിന്റെ നിറം ദുപ്പട്ടയുമായി യോജിക്കുന്നതായിരിക്കണമെന്നും കോളജ് അധികൃതരുടെ നിലപാട്. തലയില് മറ്റൊന്നും ധരിച്ച് കുട്ടികള് കോളജ് കാമ്പസില്, കാന്റീനില് പോലും കയറുതെന്നാണ് നിര്ദേശം.
മതത്തിന്റെ പേരില് കോളജിലെ സമാധാന അന്തരീക്ഷം തകര്ക്കാന് അനുവദിക്കില്ലെന്നാണ് പ്രിന്സിപ്പല് നാരായണ് ഷെട്ടിയുടെ നിലപാട്. സര്ക്കാര് ജീവനക്കാരനായ താന് സര്ക്കാര് നിര്ദേശം പാലിക്കുക മാത്രമാണ് ചെയ്തത്. -അദ്ദേഹം പറയുന്നു.
