തൃശൂര്: ചാലക്കുടിയില് ഇന്നലെ കാട്ടാനയുടെ ആക്രമണത്തില് അഞ്ചു വയസ്സുകാരി മരിച്ച സംഭവത്തില് നാട്ടുകാരുടെ പ്രതിഷേധം. ചാലക്കുടി-ആതിരപ്പള്ളി സംസ്ഥാനപാത നാട്ടുകാര് ഉപരോധിക്കുകയാണ്. കാട്ടാന ശല്യത്തിന് ശാശ്വത പരിഹാരം കാണണമെന്നാണ് നാട്ടുകാരുടെ ആവശ്യം.
അതേസമയം, മരിച്ച കുട്ടിയുടെ കുടുംബത്തിന് അഞ്ച് ലക്ഷം രൂപ ധനസഹായം നല്കുമെന്ന് വനംമന്ത്രി എ.കെ ശശീന്ദ്രന് പറഞ്ഞു. ജില്ലാ കലക്ടര് സ്ഥലം സന്ദര്ശിക്കും. വനം വകുപ്പ് ജീവനക്കാര്ക്ക് വീഴ്ചയുണ്ടായോ എന്ന് പരിശോധിക്കുമെന്നും അദ്ദേഹം അറിയിച്ചു.
വാഹനങ്ങള് കടത്തിവിടാതെയാണ് നാട്ടുകാരുടെ ഉപരോധം. പ്രശ്നപരിഹാരത്തിന് ആര്ഡിഒ അടക്കം സ്ഥലത്തെത്തിയെങ്കിലും നാട്ടുകാര് വഴങ്ങിയിട്ടില്ല.
ഇന്നലെ സന്ധ്യയ്ക്കാണ് ആതിരപ്പള്ളി കണ്ണന്കുഴിയില് അഞ്ചുവയസ്സുകാരിയെ കാട്ടാന ചവിട്ടിക്കൊന്നത്. പുത്തന്ചിറ സ്വദേശിനി ആഗ്നിമിയ ആണ് മരിച്ചത്. ആക്രമണത്തില് ആഗ്നിമിയയുടെ അച്ഛന് നിഖിലിനും ബന്ധുവിനും പരിക്കേറ്റിരുന്നു. മുത്തശ്ശിയുടെ അടിയന്തര ചടങ്ങുകള് കഴിഞ്ഞ് ബൈക്കില് മടങ്ങുന്നതിനിടെയാണ് ഇവര് കാട്ടാനയുടെ മുന്നില്പെട്ടത്.
