കൊച്ചി: മേക്കപ്പ് ചെയ്യുന്നതിനിടെ ലൈംഗികമായി പീഡിപ്പിച്ചെന്ന പരാതിയുമായി ഒരു യുവതി കൂടി. മേക്കപ്പ് ആര്ട്ടിസ്റ്റ് അനീസ് അന്സാരിക്കെതിരേ ഇവര് പോലീസില് പരാതി നല്കി. വൈറ്റില ചളിക്കവട്ടത്തെ അനീസ് അന്സാരിയുടെ ബ്രൈഡല് മേക്കപ്പ് സ്ഥാപനത്തില് വെച്ച് ലൈംഗികാതിക്രമം ഉണ്ടായെന്നാണ് ഓസ്ട്രേലിയയില് താമസിക്കുന്ന പത്തനംതിട്ട സ്വദേശിയുടെ പരാതി. വിവാഹത്തിന് മേക്കപ്പ് ചെയ്യാന് ചെന്നപ്പോള് സാരി ഉടുപ്പിക്കുന്നതിനിടെ മോശം പെരുമാറ്റമുണ്ടായെന്നാണ് സിറ്റി പോലീസ് കമ്മിഷണര്ക്ക് ഇ-മെയിലില് നല്കിയ പരാതിയില് പറയുന്നത്. വിശദമായി മൊഴി രേഖപ്പെടുത്തിയ ശേഷമാകും കേസെടുക്കുക. ഇതോടെ അനീസിനെതിരേ ഏഴു യുവതികളുടെ പരാതിയായി. അതില് നാല് കേസ് രജിസ്റ്റര് ചെയ്തു. വീഡിയോ കോണ്ഫറന്സിങ്ങിലൂടെ പരാതിക്കാരുടെ മൊഴിയെടുക്കല് തുടങ്ങി.
ഒളിവിലായ അനീസിനു വേണ്ടിയുള്ള അന്വേഷണവും പോലീസ് ഊര്ജിതമാക്കിയിട്ടുണ്ട്. കഴിഞ്ഞ ദിവസം തിരച്ചില് നോട്ടീസും പുറപ്പെടുവിച്ചു. അനീസിന്റെ പാസ്പോര്ട്ട് വാഴക്കാലയിലെ ഫ്ലാറ്റില് നിന്ന് പാലാരിവട്ടം പോലീസ് പിടിച്ചെടുത്തിരുന്നു. ചളിക്കവട്ടത്തെ മേക്കപ്പ് സ്റ്റുഡിയോയിലും തിരച്ചില് നടത്തി. പ്രതിയുമായി അടുത്ത ബന്ധം പുലര്ത്തുന്നവരെ ചോദ്യം ചെയ്യുന്നുണ്ട്. സെലിബ്രിറ്റികള് അടക്കമുള്ളവര്ക്ക് മേക്കപ്പ് ചെയ്യുന്ന അനീസിന്റെ മേക്കപ്പ് സ്റ്റുഡിയോയ്ക്ക് കേരളത്തില് വിവിധ സ്ഥലങ്ങളില് ശാഖകളുണ്ട്.
