നടിയെ ആക്രമിച്ച കേസില് അനുകൂലമായ വിധിക്കായി കാത്തിരിക്കുകയാണെന്ന്് നടി രോഹിണി. നടിക്ക് അനുകൂലമായ വിധി വരണമെന്നും സിനിമാ മേഖലയില് സ്ത്രീകള് നേരിടുന്ന പ്രശ്നങ്ങള് പരിഹരിക്കാന് രൂപീകരിച്ച ഹേമാ കമ്മിറ്റി റിപ്പോര്ട്ട് പുറത്തുവിടണമെന്നും രോഹിണി വ്യക്തമാക്കി. പാലക്കാട് നടക്കുന്ന ഡയലോഗ് അന്താരാഷ്ട്ര ചലച്ചിത്രോത്സവത്തില് കഴിഞ്ഞ ദിവസം പങ്കെടുക്കവെയാണ് രോഹിണിയുടെ പ്രതികരണം.
'നടിക്ക് അനുകൂലമായൊരു കോടതി വിധിക്കായാണ് ഞാനും കാത്തിരിക്കുന്നത്. പോപ്പുലറായ ഒരു നടിക്ക് ഇത്തരത്തിലൊരു പ്രശ്നം നേരിടേണ്ടി വന്നെങ്കില് സാധാരണക്കാരായ സ്ത്രീകള് എങ്ങനെ മുന്നോട്ടു പോകുമെന്ന് ചിന്തിക്കേണ്ടതുണ്ട്. സിനിമാ മേഖലയില് സ്ത്രീകള് നേരിടുന്ന പ്രശ്നങ്ങള് പരിഹരിക്കാന് രൂപീകരിച്ച ഹേമാ കമ്മിറ്റി റിപ്പോര്ട്ട് പുറത്തു വിടുക തന്നെ ചെയ്യണം' രോഹിണി പറഞ്ഞു.
അതേസമയം ഡയലോഗ് ഫിലിം സൊസൈറ്റിയുടെ ആറാമത് ഡയലോഗ് അന്താരാഷ്ട്ര ചലച്ചിത്രോത്സവം ഏപ്രില് ഒന്നു മുതല് അഞ്ചുവരെ ഒറ്റപ്പാലം ലക്ഷ്മി തീയേറ്ററില് വച്ചാണ് നടന്നത്.
