കൊച്ചി: സിനിമ മേഖലയിലെ സ്ത്രീകള് നേരിടുന്ന പ്രശ്നങ്ങള് പഠിക്കാന് നിയോഗിച്ച ഹേമ കമ്മിറ്റി റിപ്പോര്ട്ട് പുറത്തുവിടരുതെന്ന് ആവശ്യപ്പെട്ടത് ഡബ്ല്യുസിസിയാണെന്ന് നിയമമന്ത്രി പി.രാജീവ്. ശിപാര്ശകള് നടപ്പാക്കണമെന്നാണ് അവര് ആവശ്യപ്പെട്ടത്. തന്നെ കണ്ടശേഷം ഡബ്ല്യൂസിസിയിലെ അംഗങ്ങള് ഇക്കാര്യം വ്യക്തമാക്കിയിരുന്നു. രഹസ്യാത്മകത സൂക്ഷിക്കും എന്നറിഞ്ഞുകൊണ്ടാണ് പലരും കമ്മിറ്റിക്ക് മൊഴി നല്കിയതെന്നും മന്ത്രി പറഞ്ഞു.
പി.സി ജോര്ജിനെ ഹാജരാക്കിയപ്പോള് അസിസ്റ്റന്റ് പ്രോസിക്യൂട്ടര് എന്തുകൊണ്ട് ഹാജരായില്ല എന്നത് പരിശോധിക്കും. മുന്പ് വിദ്യാര്ത്ഥി സമരത്തിനിടെ ഞങ്ങളൊക്കെ അറസ്റ്റിലായപ്പോള് രാത്രി മജിസ്ട്രേറ്റിനു മുമ്പാകെ ഹാജരാക്കുമ്പോള് എപിപി ഹാജരായില്ലെങ്കില് ജയിലിലേക്ക് അയക്കുകയാണ് പതിവ്. ഇവിടെയെന്താണ് സംഭവിച്ചതെന്ന് എല്ലാ വശങ്ങളും പരിശോധിക്കുമെന്നും മന്ത്രി പറഞ്ഞു.
അതിനിടെ, അമ്മ ആഭ്യന്തര പരാതി പരിഹാര സമിതിയില് നിന്ന് മാല പാര്വതി രാജിവച്ചു. വിജയ് ബാബുവിനെതിരെ നടപടി സ്വീകരിക്കാത്തതില് പ്രതിഷേധിച്ചാണ് രാജി.
