ബഗോട്ട: ഫുട്ബോള് താരങ്ങള് ഉള്പ്പെട്ട വിമാനദുരന്തത്തില് നിര്ണ്ണായക തെളിവായി മാറിയേക്കാവുന്ന വിമാനത്തിന്റെ ബ്ളാക്ക് ബോക്സ് കണ്ടെത്തി. വിമാനാവശിഷ്ടങ്ങള്ക്ക് ഇടയില് പൂര്ണ്ണമായും പ്രവര്ത്തനക്ഷമമായ രീതിയില് കേടുപാടുകള് കൂടാതെയാണ് ബ്ളാക്ക് ബോക്സ് കണ്ടെത്തിയത്. കൊളംബിയന് വ്യോമയാന വിഭാഗം ബ്ളാക്ക്ബോക്സ് ശാസ്ത്രീയ പരിശോധനകള്ക്കായി അയച്ചു.
അതേസമയം ശക്തമായ കാറ്റായിരിക്കാം അപകട കാരണമെന്ന വാദം കാലാവസ്ഥാ നിരീക്ഷണ വിഭാഗം തള്ളിയിട്ടുണ്ട്. കഴിഞ്ഞ ദിവസമാണ് ബ്രസീലിയന് ഫുട്ബോള് ക്ളബ്ബ് ഷപ്പെകൊയിന്സിലെ കളിക്കാര് ഉള്പ്പെടെ ഏകദേശം എണ്പതിലധികം യാത്രക്കാരും ആറ് ജോലിക്കാരും ഉള്പ്പെട്ട വിമാനം തകര്ന്നത്. സംഭവത്തില് 75 പേര് മരണമടഞ്ഞതായിട്ടാണ് വിവരം. കോപ്പ സുഡാമെരിക്കാന മത്സരത്തിന്റെ ആദ്യപാദ ഫൈനല് മത്സരം കളിക്കാനായി പോയ ടീമാണ് അപകടത്തില് പെട്ടത്.
അപകടത്തില് ഏതാനും ചില കളിക്കാര് മാത്രമായിരുന്നു രക്ഷപ്പെട്ടത്. ടീം അംഗങ്ങള്ക്ക് പുറമേ ഒഫീഷ്യലുകളും മാധ്യമപ്രവര്ത്തകരും വരെയുണ്ടായിരുന്നു. അപകടകാരണം കണ്ടെത്താനുള്ള ശ്രമത്തിലാണ് കൊളംബിയന് വിമാനത്താവള അധികൃതര്. മെസ്സി, നെയ്മര്, റൂണി, ഇതിഹാസതാരങ്ങളായ പെലെ, മറഡോണ എന്നിവരെല്ലാം നടുക്കം രേഖപ്പെടുത്തിയിരുന്നു. ദുരന്തത്തിനിരയായ ടീമിനോടുള്ള ആദര സൂചകമായി ചാമ്പ്യന്പട്ടം ഷപ്പെകൊയിന്സ് ക്ളബ്ബിന് സമ്മാനിക്കുമെന്ന് എതിരാളികളായ കൊളംബിയന് ക്ളബ്ബ് അത്ലറ്റിക്കോ നാഷണല് പറഞ്ഞു.
