കൊച്ചി: വിലക്കയറ്റവും പ്രകൃതിക്ഷോഭവും മൂലം ജനം ദുരിതമനുഭവിക്കുമ്പോള് 100 സീറ്റ് തികയ്ക്കാന് മുഖ്യമന്ത്രി അടക്കമുള്ള മന്ത്രിപ്പട തൃക്കാക്കരയില് തമ്പടിച്ചിരിക്കുന്നത് ക്രിമിനല് കുറ്റമാണെന്ന് മുതിര്ന്ന കോണ്ഗ്രസ നേതാവ് എ.കെ ആന്റണി. ഭരണം ചീഫ് സെക്രട്ടറിക്കും കലക്ടര്മാര്ക്കും വിട്ടുനല്കിയിട്ടാണ് മന്ത്രിമാര് തൃക്കാക്കരയില് പ്രചാരണം നടത്തുന്നത്. സര്ക്കാരിന്റെ ദുര്ഭരണത്തിനെതിരായ താക്കീതായിരിക്കണം തിരഞ്ഞെടുപ്പ് ഫലമെന്നും ആന്റണി പറഞ്ഞു.
ഇടവപ്പാതി എത്തിയപ്പോഴേക്കും പലയിടത്തും മണ്ണിടിച്ചിലും ഉരുള്പൊട്ടലും വെള്ളപ്പൊക്കവുമായി. സിവില് സപ്ലൈസ് സ്റ്റാളുകളില് ഒരു സാധനവുമില്ല. വിലക്കയറ്റം രൂക്ഷമായി. സ്കൂള് തുറക്കാറായി. സാമ്പത്തികമായി ജനം ബുദ്ധിമുട്ടുന്നു. ഈ സമയം സര്ക്കാര് എല്ലാ മറന്ന് തൃക്കാക്കരയില് തമ്പടിച്ചിരിക്കുകയാണ്.
മുഖ്യമ്രന്തിക്ക് ജനങ്ങളുടെ ദുരിതങ്ങളില് ആശ്വാസം കാണാനല്ല ശ്രമം. 100 സീറ്റ് നേടി സര്ക്കാരിന് പിറന്നാള് സമ്മാനം കിട്ടാനാണ് ശ്രമിക്കുന്നത്. എന്നാല് ജനങ്ങള് നല്കാന് പോകുന്നത് ദുര്ഭരണത്തിന്റെ താക്കീതാണ്. വേണ്ടത് ഷോക് ട്രീറ്റ്മെന്റാണ്. തൃക്കാക്കരയിലുടെ കേരളത്തിലെ ജനങ്ങള് സര്ക്കാരിന് ഷോക് ട്രീറ്റ്മെന്റ് നല്കണം.
ഇന്ത്യയുടെ വികസനത്തിന്റെ അവകാശം ആര്ക്കെങ്കിലും ഉണ്ടെങ്കില് അത് കോണ്ഗ്രസിനാണ്. നെഹ്റു മുതല് കോണ്ഗ്രസ് നേതൃത്വവും പങ്കാളിത്തവുമുള്ള സര്ക്കാരാണ് വികസനം കൊണ്ടുവന്നത്.
കൊച്ചി മെട്രായുടെ ശില്പി ഉമ്മന് ചാണ്ടിയാണ്. ഉമ്മന് ചാണ്ടിയുടെ നിശ്ചയദാര്ഢ്യമാണ് പദ്ധതി നടപ്പാക്കിയത്. ദ്വീപുകളിലേക്ക് പാലം കൊണ്ടുവന്നത് തന്റെ കാലത്താണ്.
കേരളത്തിന്റെ വികസനത്തെ തകര്ക്കുന്നതില് പ്രധാന പങ്ക് സിപിഎമ്മിനാണ്. അതില് ഏറ്റവും പങ്ക് ഇന്നത്തെ മുഖ്യമന്ത്രിയ്ക്കായിരുന്നു. നശീകരണത്തിന്റെയും അക്രമത്തിന്റെയും വികസന വിരോധത്തിന്റെയും ആളുകള് അധികാരം കിട്ടിയപ്പോള് വികസനത്തെ കുറിച്ച് പറയുന്നു. എല്ലാ വികസന പരിപാടികളെയും തല്ലിത്തകര്ത്തവരാണ്. അവരെ തൃക്കാക്കരയിലെ ജനങ്ങള്ക്കറിയാം. തൊണ്ടുതല്ലി മിഷന് മുതല് കമ്പ്യുട്ടര് വരെ അടിച്ചുതകര്ത്തവരാണ് ഇപ്പോള് വികസനത്തെ കുറിച്ച പറയുന്നത്.
കഴിഞ്ഞ ഒരു വര്ഷക്കാലം ജനങ്ങളെ മറന്ന് ഏകാധിപത്യ ഭരണം നടത്തുന്ന ഇടതുമുന്നണിക്ക് സീറ്റല്ല, വോട്ട് കൂടിയാല് പോലും ഇനിയുള്ള നാല് വര്ഷക്കാലം ഏകാധിപതിയുടെ രാജഭരണമായിരിക്കും. അഹങ്കാരത്തിന്റെയും അക്രമത്തിന്റെയും ആര്ഭാടത്തിന്റെയും ഭരണമായിരിക്കും. അതുണ്ടാകാതിരിക്കാന് സിപിഎമ്മിനെ അന്തസ്സായി ചെണ്ടകൊട്ടി തോല്പ്പിക്കണം.
ഉമ തോമസിന്റെ അയല്വക്കത്തുവരാന് മറ്റു സ്ഥാനാര്ത്ഥികള്ക്ക് കഴിഞ്ഞിട്ടില്ല. തൃക്കാക്കരക്കാരുടെ മനസ്സില് ജ്വലിക്കുന്ന ഓര്മ്മയാണ് പി.ടി തോമസ്. അവര് ഉമയ്ക്ക് വോട്ട് ചെയ്യുമ്പോള് പി.ടിയാണ് വിജയിക്കുന്നത്. മഹാരാജാസ് കോളജില് കെ.എസ്.യു പ്രവര്ത്തകയായിരുന്ന കാലം മുതല് പടപൊരുതി കയറി വന്നതാണ് ഉമ. പി.ടി തോമസ് രാഷ്ട്രീയ പ്രവര്ത്തകനായിരിക്കുമ്പോള് അവര് ജോലി ചെയ്താണ് കുടുംബം പുലര്ത്തിയത്. എത്രമാത്രം കുലീനവും അന്തസ്സുമുള്ളയാണ് ഉമ തോമസ്.- ആന്റണി കൂട്ടിച്ചേര്ത്തു.
