കൊച്ചി: നടിയെ ആക്രമിച്ച കേസുമായി ബന്ധപ്പെട്ട് മുന് ജയില് ഡിജിപി ആര്.ശ്രീലേഖ നടത്തിയ വെളിപ്പെടുത്തലുകള് നിഷേധിച്ച് സംവിധായകന് ബാലചന്ദ്രകുമാര്. ശ്രീലേഖ് ഉണ്ടാക്കിയ തിരക്കഥയാണിത്. അവര്ക്ക് ദിലീപിനോട് ആരാധനയാണെന്നും ബാലചന്ദ്രകുമാര് പറഞ്ഞു.
ശ്രീലേഖ ഇപ്പോള് പറഞ്ഞ കാര്യങ്ങള് എന്തുകൊണ്ട് നേരത്തെ സര്ക്കാരിനെ അറിയിച്ചില്ല. അവര്ക്കത എഴുതി നല്കാമായിരുന്നു. സംഭവത്തില് അന്വേഷണം നടക്കട്ടെ. സര്വീസില് നിന്നും വിരമിക്കാന് കാത്തുനില്ക്കുകയായിരുന്നു വെളിപ്പെടുത്തല് നടത്താന്. ഇതിന്റെ പിന്നില് ഗൂഢാലോചനയുണ്ടെന്നും ബാലചന്ദ്രകുമാര് ആരോപിച്ചു.
ശ്രീലേഖയുടെ വെളിപ്പെടുത്തല് തന്നെ ബാധിക്കില്ല. പോലീസിനെ മോശക്കാരാക്കാനുള്ള ശ്രമമാണ് നടക്കുന്നത്. തെളിവുകള് പലതും പോലീസിന്റെ പക്കലുണ്ട്. ദിലീപ് ഫോണുകള് ഒളിപ്പിച്ചതെന്തിനെന്നും ബാലചന്ദ്രകുമാര് ചോദിക്കുന്നു.
അതേസമയം, ശ്രീലേഖയ്ക്കെതിരെ കോടതിയലക്ഷ്യ നടപടിക്ക് ഒരുങ്ങുകയാണ് പ്രോസിക്യുഷന്. കോടതിയുടെ പരിഗണനയിലിരിക്കുന്ന വിഷയത്തില് അവര് നടത്തിയത് അഭിപ്രായപ്രകടനമായി കാണക്കാക്കണമെന്നും പ്രോസിക്യുഷന് ആവശ്യപ്പെടും. വിചാരണ നടക്കുന്ന കേസിലാണ് പ്രതിയെ നിരപരാധിയായി ചിത്രീകരിച്ചിരിക്കുന്നത്.
അന്വേഷണ വിവരങ്ങള് അറിയുന്ന ആളല്ല ശ്രീലേഖ. ഇത്തരം ആരോപണവുമായി വരുന്നതിന്റെ കാരണം പരിശോധിക്കണമെന്നുമാണ് പ്രോസിക്യുഷന് നിലപാട് എടുക്കുക. ശ്രീലേഖയില് നിന്ന് മൊഴിയെടുക്കും. ഇതിനായി അന്വേഷണ സംഘം കോടതിയെ സമീപിക്കും.
നടിയെ ആക്രമിച്ച കേസില് ദിലീപ് നിരപരാധിയാണെന്നും തെളിവുകള് പലതും പോലീസ് കെട്ടിച്ചമച്ചതാണെന്നുമായരുന്നു ശ്രീലേഖ തന്റെ യു ട്യൂബ് ചാനലിലൂടെ വെളിപ്പെടുത്തിയത്.
