അഹമ്മദാബാദ്: ഗുജറാത്ത് നിയമസഭാ തിരഞ്ഞെടുപ്പിനു മുന്നോടിയായുള്ള ഒരുക്കങ്ങളുമായി ആം ആദ്മി പാര്ട്ടി. തിരഞ്ഞെടുപ്പില് പാര്ട്ടിയുടെ മുഖ്യമന്ത്രി സ്ഥനാര്ത്ഥിയെ കണ്ടെത്താനുള്ള അഭിപ്രായ വോട്ടിന് പാര്ട്ടി അധ്യക്ഷനും ഡല്ഹി മുഖ്യമന്ത്രിയുമായ അരവിന്ദ് കെജ്രിവാള് തുടക്കമിട്ടു. 'ചൂസ് യുവര് ചീഫ് മിനിസ്റ്റര്' എന്ന പേരിലാണ് പ്രചാരണം. തിരഞ്ഞെടുപ്പ് ആവേശം ജനങ്ങളില് നിറയ്ക്കാന് റാലികളും യോഗങ്ങളും തുടങ്ങിക്കഴിഞ്ഞു. സൗജന്യ വൈദ്യുതി, മികച്ച വിദ്യാഭ്യാസം, ആരോഗ്യ പരിരക്ഷ തുടങ്ങിയവയാണ് എഎപി മുന്നോട്ടുവയ്ക്കുന്ന വാഗ്ദാനങ്ങള്.
ജനങ്ങള് മാറ്റം ആഗ്രഹിക്കുന്നു. അവര് വിലക്കയറ്റത്തിലും തൊഴിലില്ലായ്മയിലും പരിഹാരം തേടുകയാണ്. ബി.ജെ.പി അവരുടെ മുഖ്യമന്ത്രിയെ മാറ്റിക്കൊണ്ടിരിക്കുന്നു. ആദ്യം വിജയ് രൂപാണിയായിരുന്നു. ഒരു വര്ഷം മുന്പ് ഭൂപേന്ദ്ര പട്ടേലിനെ നിയമിച്ചു. വിജയ് രൂപാണിക്ക് എന്തെങ്കിലും കുഴപ്പമുണ്ടായിരുന്നു എന്നാണോ അതിനര്ത്ഥം. -വാര്ത്താ സമ്മേളനത്തില് കെജ്രിവാള് ചോദിച്ചു.
രുപാണിയെ കൊണ്ടുവന്നപ്പോള് ജനങ്ങളോട് ഒന്നും ചോദിച്ചില്ല. ഡല്ഹിയില് നിന്നുള്ള തീരുമാനമായിരുന്നു അത്. ജനാധിപത്യത്തില് ആരായിരിക്കം മുഖ്യമന്ത്രിയെന്ന് തീരുമാനിക്കേണ്ടത് ജനങ്ങളാണ്. അത് ബി.ജെ.പി 2016ലോ 2021ലോ ചോദിച്ചിട്ടില്ല. മുഖ്യമന്ത്രി ആരായിരിക്കണമെന്ന് ജനങ്ങളോട് എഎപി ചോദിക്കുകയാണ്. പഞ്ചാബില് അതാണ് സംഭവിച്ചത്. ആരായിരിക്കണം മുഖ്യമന്ത്രിയെന്ന ജനങ്ങളുടെ താല്പര്യം അറിഞ്ഞാണ് ഭഗവന്ത് മാനിനെ പ്രഖ്യാപിച്ചതെന്നും അദ്ദേഹം പറഞ്ഞു.
ഗുജറാത്തില് എഎപി സര്ക്കാരുണ്ടാക്കാന് പോവുകയാണ്. ഈ പശ്ചാത്തലത്തില് അടുത്ത മുഖ്യമന്ത്രി ആരായിരിക്കണമെന്ന് കണ്ടെത്താനുള്ള സ്ഥനാര്ത്ഥി നിര്ണയമാണ് നടക്കുന്നത്. ഇന്ന് മുതല് ജനങ്ങള് പറയുന്ന ആളില് നിന്നായിരിക്കും മുഖ്യമന്ത്രിയെ തിരഞ്ഞെടുക്കുക.
ജനങ്ങളുടെ അഭിപ്രായം അറിയിക്കാന് നാല് മാര്ഗങ്ങളാണുള്ളത്. 6357000360 എന്ന മൊബൈല് നമ്പര് നല്കിയിട്ടുണ്ട്. ഇതിലേക്ക് എസ്എംഎസ് ആയോ വാട്സ്ആപ് സന്ദേശം ആയോ വോയിസ് മെസോജ് ആയോ പേര് നിര്ദേശിക്കാം. aapnocm@gmail.com എന്ന ഇമെയില് അഡ്രസിലും നിര്ദേശം അയക്കാം. നവംബര് മൂന്നിന് വൈകിട്ട് 5 മണിവരെയാണ് നിര്ദേശങ്ങള് സമര്പ്പിക്കാനുള്ള സമയം. തിരഞ്ഞെടുക്കുന്ന ആളെ നവംബര് നാലിന് പ്രഖ്യാപിക്കും.
ഗുജറാത്ത് നിയമസഭാ തിരഞ്ഞെടുപ്പ് ഈ വര്ഷം അവസാനമാണ് നടക്കേണ്ടത്. 182 അംഗങ്ങളാണ് നിയമസഭയിലുള്ളത്. തിരഞ്ഞെടുപ്പ് കമ്മീഷന് ഇതുവരെ തീയതി പ്രഖ്യാപിച്ചിട്ടില്ല. ഈ വര്ഷം കാലാവധി കഴിയുന്ന ഹിമാചല് പ്രദേശ് നിയമസഭയിലേക്കുള്ള തിരഞ്ഞെടുപ്പ് പ്രഖ്യാപിക്കുകയും ചെയ്തിട്ടുണ്ട്.
Comments