കൊച്ചി: കേരള സാങ്കേതിക സര്വകലാശാല വൈസ് ചാന്സലറായി സിസ തോമസിനെ നിയമിച്ച ഗവര്ണര് ആരിഫ് മുഹമ്മദ് ഖാന്റെ നടപടി ചോദ്യം ചെയ്ത് സംസ്ഥാന സര്ക്കാര് സമര്പ്പിച്ച ഹര്ജി ഹൈക്കോടതി ഫയലില് സ്വീകരിച്ചു. ഹര്ജിയില് സത്യവാങ്മൂലം സമര്പ്പിക്കാന് ഗവര്ണറുടെ അഭിഭാഷകനോടും സിസ തോമസിന്റെ അഭിഭാഷകനും യുജിസിക്കും കോടതി നിര്ദേശം നല്കി. ബുധനാഴ്ചയ്ക്കകം സത്യവാങ്മൂലം സമര്പ്പിക്കണം. കേസ് വെള്ളിയാഴ്ച പരിഗണിക്കും.
ഇത്തരം വ്യവഹാരങ്ങള് വലിയ തോതില് പെരുകുകയാണെന്ന് ഹര്ജി പരിഗണിക്കുമ്പോള് കോടതി ചൂണ്ടിക്കാട്ടി. അത് കുട്ടികളുടെ ഭാവിയെ ആണ് ബാധിക്കുന്നത്. കോടതി പരിഗണിക്കുന്നത് അതാണെന്നും ജസ്റ്റീസ് ദേവന് രാമചന്ദ്രന് അറിയിച്ചു.
വി.സി നിയമനത്തിന് സര്ക്കാര് നിര്ദേശിച്ചവരുടെയും സിസ തോമസിന്റെയും യോഗ്യതകള് നിര്ദേശിക്കാനാണ് നിര്ദേശം. യുജിസി നിലപാടും ബുധനാഴ്ചയ്ക്കകം സമര്പ്പിക്കണം.
ഗവര്ണര്ക്ക് വേണ്ടി പുതിയ അഭിഭാഷകനാണ് ഇന്ന് ഹാജരായത്. കേസില് കൂടുതല് സാവകാശം വേണമെന്ന് ഗവര്ണറുടെയും സിസ തോമസിന്റെയും അഭിഭാഷകര് ആവശ്യപ്പെട്ടു.
കഴിഞ്ഞ ദിവസം ഹര്ജി പരിഗണിച്ച കോടതി, യു.ജി.സിയേയും കക്ഷിചേര്ക്കാന് നിര്ദേശിച്ചിരുന്നു.
