മൂന്നാര്: ദേവികുളം മുന് എംഎല്എ എസ് രാജേന്ദ്രനോട് ഏഴ് ദിവസത്തിനകം വീട് ഒഴിയണമെന്ന് ആവശ്യപ്പെട്ട് നോട്ടീസ് നല്കി. രാജേന്ദ്രന് താമസിക്കുന്ന മൂന്നാര് ഇക്കാ നഗറിലെ 7 സെന്റ് ഭൂമിയില് നിന്ന് ഒഴിയണമെന്നാണ് ദേവികുളം സബ് കലക്ടര് ആവശ്യപ്പെട്ടിരിക്കുന്നത്. ഇത് പുറമ്പോക്കായതിനാലാണ് ഒഴിപ്പിക്കുന്നതെന്ന് നോട്ടീസില് പറയുന്നു.
ദേവികുളം സബ് കളക്ടറുടെ നിര്ദ്ദേശ പ്രകാരം വില്ലേജ് ഓഫീസറാണ് നോട്ടീസ് നല്കിയിരിക്കുന്നത്. ഒഴിഞ്ഞു പോയില്ലെങ്കില് ബലമായി ഒഴിപ്പിക്കും എന്ന് നോട്ടീസില് പറയുന്നു. ബലമായി ഒഴിപ്പിക്കാന് പോലീസ് സംരക്ഷണം ആവശ്യപ്പെട്ട് ദേവികുളം രാഹുല് ആര് ശര്മ ഇടുക്കി എസ്പിക്ക് കത്തും നല്കിയിട്ടുണ്ട്.
അതേസമയം, ഒഴിപ്പിക്കാന് നോട്ടീസ് നല്കിയതിനു പിന്നില് ഗൂഢാലോചനയുണ്ടെന്ന് എസ്.രാജേന്ദ്രന് പറയുന്നു. വിഷയത്തില് കോടതിയെ സമീപിച്ചിട്ടുണ്ട്. വീട് ഒഴിഞ്ഞുപോകാന് തത്കാലം തീരുമാനിച്ചിട്ടില്ല. 10 സെന്റില് താഴെ ഭൂമിയില് താമസിക്കുന്നവരെ ഒഴിപ്പിക്കേണ്ടെന്ന് സംസ്ഥാന സര്ക്കാര് നേരത്തെ തീരുമാനിച്ചതാണ്. അതിന് വിപരീതമാണ് ഇപ്പോഴത്തെ നടപടി. ഇത് രാഷ്ട്രീയ പകപോക്കലാണോയെന്ന് ഇപ്പോള് പറയുന്നില്ലെന്നും അദ്ദേഹം പറഞ്ഞു.
ഈ പ്രദേശത്തുള്ള 30 പേര്ക്ക് കാരണം കാണിക്കല് നോട്ടീസ് നല്കിയപ്പോള് തനിക്ക് മാത്രമാണ് വീട് ഒഴിയാന് ആവശ്യപ്പെട്ട് നോട്ടീസ് നല്കിയിരിക്കുന്നതെന്ന് എസ് രാജേന്ദ്രന് പറഞ്ഞു. തന്റേത് ഒഴികെ മറ്റെല്ലാവരും കൈയ്യേറിയത് കെഎസ്ഇബി ഭൂമിയാണെന്ന് നോട്ടീസില് എഴുതിയിരിക്കുന്നത്. തന്റേത് മാത്രം സര്ക്കാര് പുറമ്പോക്ക് എന്നെഴുതിയതില് ഗൂഢാലോചനയുണ്ടെന്നും രാജേന്ദ്രന് ആരോപിച്ചു.
