ആലപ്പുഴ: ഫോട്ടോയെടുത്തതിനെ ചൊല്ലിയുണ്ടായ തര്ക്കത്തില് യുവാവ് നടത്തിയ അക്രമത്തില് ശബരിമല തീര്ത്ഥാടകയ്ക്ക് പരിക്ക്. തീര്ത്ഥാടകര് സഞ്ചരിച്ച വാഹനത്തിന്റെ ചില്ലുകള് യുവാവ് അടിച്ചു തകര്ത്തു. മലപ്പുറം സ്വദേശികളായ അയ്യപ്പഭക്തര് ദര്ശനം കഴിഞ്ഞ് മടങ്ങിവരുന്നതിനിടെയാണ് ആക്രമണം നേരിട്ടത്. സംഘത്തില് 9 കുട്ടികളടക്കം 39 പേരുണ്ടായിരുന്നു. സംഘത്തിലെ ഒമ്പതുവയസ്സുകാരിക്ക് പരിക്കേറ്റു.
ശബരിമല തീര്ത്ഥാടനം കഴിഞ്ഞ് മടങ്ങിപ്പോകുമ്പോള് ആലപ്പുഴ കളര്കോട് ജംഗ്ഷനില് വെച്ച് വാഹനം നിര്ത്തിയപ്പോഴാണ് സംഭവം. ചായകുടിക്കാന് ഇറങ്ങിയ തീര്ത്ഥാടക സംഘത്തില്പെട്ടവര് മൊബൈല് ഫോണില് ഫോട്ടോയെടുത്തു. ഇത് ചോദ്യം ചെയ്തുകൊണ്ട് യുവാവ് രംഗത്ത് വരികയായിരുന്നു. തന്റെയും ഒപ്പമുണ്ടായിരുന്ന യുവതിയുടേയും ചിത്രം ക്യാമറയില് പകര്ത്തിയെന്ന് ആരോപിച്ച് യുവാവ് ബഹളം വെയ്ക്കുകയായിരുന്നു.
മൊബൈലില് ചിത്രമെടുക്കുകയായിരുന്ന രണ്ടു പെണ്കുട്ടികളില് ഒരാള്ക്ക് നേരെ യുവാവ് കയ്യേറ്റം നടത്തി. കൂട്ടത്തിലെ ഒമ്പത് വയസ്സുകാരിയുടെ കൈയ്ക്ക് പരിക്കേറ്റു. ഇതോടെ സംഘത്തിലെ മറ്റുള്ളവര് ഇത് ചോദ്യം ചെയ്യുകയും മടങ്ങിപ്പോയ യുവാവ് തിരികെ വന്ന് ബസിന്റെ ചില്ല് തകര്ക്കുകയും ചെയ്തു. യുവാവിനൊപ്പം ടെലിവിഷന് റിയാലിറ്റിഷോയില് താരമായ പെണ്കുട്ടിയും ഉണ്ടായിരുന്നതായിട്ടാണ് തീര്ത്ഥാടക സംഘത്തിന്റെ ആരോപണം.
