ജോഷിമഠ്: കെട്ടിടങ്ങളും മറ്റും ഇടിഞ്ഞു താണു കൊണ്ടിരിക്കുന്ന ജോഷിമഠില് പുലര്ച്ചെ ആരുമറിയാതെ കുഴിക്കല് ജോലികള് നടക്കുന്നു. ഭിത്തിയിലും തറയിലും വിള്ളല് വീണ നിലയില് 700 കെട്ടിടങ്ങള്ക്കാണ് ജോഷിമഠില് കേടുപാടുകള് വന്നിരിക്കുന്നത്. പ്രദേശവാസികള് സുരക്ഷിത സ്ഥാനത്തേക്ക് ജീവനും പിടിച്ചുകൊണ്ടോടുമ്പോള് ഇരുട്ടിന്റെ മറവില് നടക്കുന്നത് പൈലിംഗ് ജോലികളാണ്.
ബുധനാഴ്ച പുലര്ച്ചെ രണ്ടുമണിക്ക് ജോഷിമഠിന് പുറത്തെ കുന്നികളില് കുഴിയെടുക്കലും പാറപൊട്ടിക്കലുമെല്ലാം നടക്കുന്നതിന്റെ വീഡിയോ ദൃശ്യങ്ങള് പുറത്തു വന്നിട്ടുണ്ട്. ബദരീനാഥുമായി ബന്ധപ്പിക്കുന്ന ഹൈവേയ്ക്ക് സമീപത്താണ് നിര്മ്മാണ ചോലികള്. മണ്ണു കുഴിച്ചെടുക്കുന്നതിന്റെയും മറ്റും ശബ്ദം ഒരു കിലോമീറ്ററിന് അപ്പുറത്ത് വരെ കേള്ക്കാവുന്ന നിലയിലാണെന്ന് വാര്ത്ത പുറത്തുവിട്ടിരിക്കുന്ന മാധ്യമം റിപ്പോര്ട്ട് ചെയ്യുന്നു.
മണ്ണിടിഞ്ഞു താഴുന്ന അവസ്ഥയില് ജോഷിമഠില് നിര്മ്മാണ പ്രവര്ത്തനങ്ങള് നിര്ത്തി വെച്ചിരിക്കുകയാണ്. റോഡ് നിര്മ്മാണ ജോലികളും തടഞ്ഞിട്ടിരിക്കുകയാണ്. ബദരീനാഥിന്റെ പ്രവേശന കവാടമായ ജോഷിമഠില് ആയിരക്കണക്കിന് പേരാണ് ഭയന്നും വിറച്ചും അവിടം വിട്ടുപൊയ്ക്കൊണ്ടിരിക്കുന്നത്. ജോഷിമഠിന്റെ ഈ സ്ഥിതിയ്ക്ക് കാരണം ഒരു പ്ലാനും പദ്ധതിയുമില്ലാത്ത നിര്മ്മാണ പ്രവര്ത്തനങ്ങളായിരുന്നു. പുതിയ സംഭവവികാസങ്ങളുടെ പശ്ചാത്തലത്തില് രണ്ടുഹോട്ടലുകളുടെയും അനേകം വീടുകളുടെയും നിര്മ്മാണങ്ങള് നാട്ടുകാരുടെ പ്രതിഷേധത്തെ തുടര്ന്ന് നിര്ത്തി വെയ്ക്കേണ്ടി വന്നിരുന്നു.
