പാരീസ്: ലോകകപ്പിന് ശേഷമുള്ള ആദ്യ ടച്ച് തന്നെ ഉജ്വലമാക്കി ഇതിഹാസതാരം ലിയോണേല് മെസ്സി. മാസങ്ങള്ക്ക് ശേഷം ഫ്രഞ്ച് ലീഗ് വണ്ണില് പന്ത് തട്ടിത്തുടങ്ങിയ മെസ്സിയുടെ മികവില് പി.എസ്.ജി. ആദ്യ മത്സരത്തില് വിജയം നേടി. ഏകപക്ഷീയമായ രണ്ടു ഗോളിനായിരുന്നു പാരീസ് സെന്റ് ജെര്മെയ്ന്റെ വിജയം. മത്സരത്തില് മെസ്സി ഗോള് നേടുകയും ചെയ്തു.
സ്വന്തം മൈതാനമായ പാര്ക്ക് ഡെസ് പ്രിന്സസില് വാം അപ്പിനായി ഇറങ്ങിയപ്പോള് തന്നെ താരം തൊടുന്ന ഓരോ പന്തിനും കാണികള് ഇളകി. ഇതിഹാസ ഫുട്ബോളര് പെലെയ്ക്ക് ആദരം അര്പ്പിക്കുന്ന വെള്ള ടീ ഷര്ട്ട് ധരിച്ചായിരുന്നു മെസ്സി കളത്തിലെത്തിയത്. എംബാപ്പേ ഇല്ലാതെ ഇറങ്ങിയ പി.എസ്.ജി. യ്ക്കായി മെസ്സി സഹതാരങ്ങളായ നെയ്മറും റാമോസുമായി മികച്ച ധാരണയോടെയാണ് കളിച്ചത്. മെസ്സി നേടിയ രണ്ടാം ഗോള് തന്നെ ഇതിനുദാഹരണമായിരുന്നു. ചെറുപാസുകളുമായി കൊടുത്തു വാങ്ങിക്കയറിയ താരം ഗോള് നേടി.
ഈ ഗോള് തുടര്ച്ചയായി താരം കളിച്ച അഞ്ചു മത്സരങ്ങളില് ആറാമത്തേതായിരുന്നു. ഇതില് ലോകകപ്പ് ഫൈനലിലെ രണ്ടുഗോളുകള് കൂടി വരും. കളിതുടങ്ങി അഞ്ചാം മിനിറ്റില് തന്നെ പി.എസ്.ജി. ഗോള് നേടി. ഹ്യൂഗോ എകിടികെ ആയിരുന്നു ഗോള് നേടിയത്. 72 ാം മിനിറ്റിലായിരുന്നു മെസ്സിയുടെ ഗോള് വന്നത്. ഈ മത്സരത്തോടെ പി.എസ്.ജി. യ്ക്ക് 47 പോയിന്റായി. ഫെബ്രുവരി 16 ന് ചാംപ്യന്സ് ലീഗില് ബയേണ് മ്യൂണിക്കിന് എതിരേ പി.എസ്.ജിയ്ക്ക് കളിയുണ്ട്.
Messi’s goal from this angle is spectacular pic.twitter.com/5HfXXmfZM5
— MC (@CrewsMat10) January 11, 2023
