ലണ്ടന്: ഡ്രൈവ് ചെയ്യുന്നതിനിടെ സോഷ്യല് മീഡിയ വീഡിയോ ചിത്രീകരിക്കുന്നതിനായി സീറ്റ് ബെല്റ്റ് അഴിച്ചതിന് ക്ഷമാപണം നടത്തി ബ്രിട്ടീഷ് പ്രധാനമന്ത്രി ഋഷി സുനക്. തന്റെ സീറ്റ് ബെല്റ്റ് കുറച്ച് സമയത്തേക്ക് നീക്കുക മാത്രമാണ് ചെയ്തതെന്നും തനിക്ക് തെറ്റു പറ്റിയതായി അദ്ദേഹം സമ്മതിക്കുന്നുവെന്നും സുനക്കിന്റെ വക്താവ് പറഞ്ഞു.
വീഡിയോ ചിത്രീകരിക്കുന്നതിനായി പ്രധാനമന്ത്രിതന്റെ സീറ്റ് ബെല്റ്റ് അഴിച്ചു. ഇത് തെറ്റാണെന്ന് അദ്ദേഹം പൂര്ണമായി അംഗീകരിക്കുന്നു, അതിനാല് ക്ഷമ ചോദിക്കുന്നു. നിങ്ങള് എല്ലാവരും കൃത്യമായി സീറ്റ് ബല്റ്റ് ധരിക്കണമെന്നും അദ്ദേഹം പറഞ്ഞതായി വക്താവ് കൂട്ടിച്ചേര്ത്തു.
രാജ്യത്തുടനീളമുളള നൂറിലധികം പ്രോജക്ടുകള്ക്ക് ധനസഹായം നല്കുന്നതിനുളള ഗവണ്മെന്റിന്റെ പുതിയ ലെവലിംഗ് അപ്പ് ഫണ്ട് പ്രഖ്യാപനങ്ങള് പ്രോത്സാഹിപ്പിക്കുന്നതിനു വേണ്ടിയായിരുന്നു സുനക് ആ വീഡിയോ ചിത്രീകരിച്ചത്. ക്യാമറയെ അഭിസംബോധന ചെയ്യുമ്പോള് പോലീസിന്റെ മോട്ടോര് ബൈക്കുകള് അദ്ദേഹത്തിന്റെ കാറിന് അകമ്പടി സേവിക്കുന്നത് വീഡിയോയില് കാണാം.
തന്റെ കാര്ഡ് ഉപയോഗിച്ച് കോണ്ടാക്ട്ലെസ് പെയ്മെന്റ് നടത്താന് നന്നേ പാടുപെടുന്ന സുനക് ഡെബിറ്റ് കാര്ഡ് , ട്രെയിന് സര്വീസ് ഈ രാജ്യം അനുദിനം വളര്ന്നുകൊണ്ടിരിക്കുന്ന സമ്പദ്വ്യവസ്ഥ എന്നിവയെല്ലാം എങ്ങനെ കൈകാര്യം ചെയ്യുമെന്ന് അറിയില്ലെന്നും ഇതെല്ലാം വേദനാജനകമായ കാഴ്ചയാണെന്നും പ്രതിപക്ഷ പാര്ട്ടി വക്താവ് പറഞ്ഞു.
യുകെയില് കാറിലിരിക്കുമ്പോള് സീറ്റ്ബെല്റ്റ് ധരിക്കാത്ത ആളുകള്ക്ക് മെഡിക്കല് ഇളവില്ലാതെ100 പൗണ്ട് പിഴ ചുമത്താനുളള അധികാരമുണ്ട്. കേസ് കോടതിയിലെത്തിയാല് അത് 500 പൗണ്ടായി വര്ധിക്കും.
