റൂജാ ഇഗ്നാട്ടോവയെക്കുറിച്ച് കേട്ടിട്ടുണ്ടോ? സാമ്പത്തീക തട്ടിപ്പിന്റെയും ധനകാര്യ സ്ഥാപനങ്ങളുടെ മുതലാളിമാര് കോടികളുമായി മുങ്ങിയതിന്റെയും നിറം പിടിപ്പിച്ച കഥകളുടെ ഇപ്പോഴത്തെ ട്രെന്റില് പ്രവീണ് റാണമാരുടെ രാജ്ഞിയെന്ന് വേണമെങ്കില് റൂജയെ വിളിക്കാം. എഫ്.ബി.ഐ. യുടെ മോസ്റ്റ് വാണ്ടഡ് പട്ടികയില് ആദ്യ പത്തില് ഇടം പിടിച്ചിട്ടുള്ള റൂജ മുങ്ങിയത് 4 ബില്യണ് ഡോളറുമായിട്ടാണ്. ഇന്ത്യന് കണക്കില് പറഞ്ഞാല് ഏകദേശം 31,580 കോടി രൂപയുമായി.
ലോകത്തുടനീളമുള്ള അനേകം നിക്ഷേപകരുടെ പണവുമായിട്ടാണ് റൂജ മുങ്ങിയത്. 2014 ലായിരുന്നു റൂജ തട്ടിപ്പ് നടത്തിയത്. ക്രിപ്റ്റോ കറന്സി വിപണിയില് ബിറ്റ്കോയിന് എതിരാളിയായി വണ് കോയിന് എന്ന ഒരു കമ്പനി തുടങ്ങുന്നതായി വിശ്വസിപ്പിച്ച് ലോകത്തുടനീളമുള്ള നിക്ഷേപകരില് നിന്നുമാണ് പണം തട്ടിയത്. 2017 ല് വിമാനത്തില് ബള്ഗേറിയയിലെ സോഫിയയിലേക്ക് പോയതിന് ശേഷം ഇവരെ പിന്നീട് ആരും ഇതുവരെ കണ്ടിട്ടില്ല.
2016 ല് ലണ്ടനിലെ വെംബ്ളി അരീനയിലാണ് റൂജയെ അവസാനമായി പൊതുവേദിയില് ആള്ക്കാര് കണ്ടത്. മുങ്ങിയതോടെ അമേരിക്കന് അധികൃതര് റൂജയ്ക്ക് എതിരേ വാറന്റ് പുറപ്പെടുവിച്ചിട്ടുണ്ട്. ഇവരുടെ ഒരു വിവരങ്ങളും ഇല്ലാത്തതിനാല് ലോ എന്ഫോഴ്സ്മെന്റ് ഇവരെ കണ്ടെത്താന് പാടുപെടുകയാണ്. കാണാതായതിന് പിന്നാലെ ഇവരുടെ വിവരങ്ങള് കണ്ടെത്താനുള്ള ശ്രമത്തിലാണ് എഫ് ബി ഐ. 259 പേരുള്ള മോസ്റ്റ് വാണ്ടഡുകളുടെ പട്ടികയില് വനിതകളായ 11 പേരില് ഒരാളാണ് റൂജ. ടോപ്പ് ടെന്നിലുള്ള ഏക വനിതയും.
