ഡല്ഹിയിലെ സംസ്ഥാന സര്ക്കാരിന്റെ പ്രത്യേക പ്രതിനിധിയായി നിയമിതനായ മുന് കേന്ദ്ര മന്ത്രി കെ.വി തോമസ് ഇന്ന് ഡല്ഹിയിലേക്ക് തിരിക്കും. റിപ്പബ്ലിക് ദിനത്തില് ഇദ്ദേഹമാണ് കേരള ഹൗസില് പതാക ഉയര്ത്തുക. കഴിഞ്ഞ ദിവസം കെ.വി തോമസ് മുഖ്യമന്ത്രി പിണറായി വിജയനെ സന്ദര്ശിച്ചിരുന്നു.
കേന്ദ്രസര്ക്കാരിന് മുന്നില് വയ്ക്കേണ്ട കേരളത്തിന്റെ ആവശ്യങ്ങള് മുഖ്യമന്ത്രി അദ്ദേഹത്തിന്റെ ശ്രദ്ധയില്പ്പെടുത്തി. കിഫ്ബി വഴിയെടുക്കുന്ന വായ്പ സംസ്ഥാന കടത്തില് കണക്കാക്കുന്നതും, പ്രളയകാലത്ത് നല്കിയ അരിക്ക് കേന്ദ്രം വിലയാവശ്യപ്പെട്ടതും, കേന്ദ്രത്തിന്റെ ദേശീയപാത വികസനത്തിന് സംസ്ഥാനവും വിഹിതം വഹിക്കണമെന്ന തീരുമാനവും കൂടിക്കാഴ്ചയില് ചര്ച്ചാവിഷയമായി. കൂടാതെ എയിംസ് അനുവദിക്കണമെന്ന ആവശ്യവും കെ.വി തോമസ് കേന്ദ്രസര്ക്കാരിന്റെ മുന്നില് അവതരിപ്പിക്കും.
ഒന്നാം പിണറായി സര്ക്കാരിന്റെ കാലത്ത് മുന് എം.പി എ സമ്പത്ത് വഹിച്ച പദവിയിലേക്കാണ് കെ.വി തോമസിനെ ഇപ്പോള് നിയമിച്ചിരിക്കുന്നത്.
