ഇടുക്കി: തിന്നുന്നെങ്കില് ആന്റണിയുടെ കടയിലെ അരി തന്നെ തിന്നും. കഴിഞ്ഞ ഒരു വര്ഷത്തിനിടയില് ശാന്തന്പാറയിലെ ആന്റണിയുടെ റേഷന് കട കാട്ടാന തകര്ക്കുന്നത് 11 തവണ. അരി തിന്നുന്നത് പതിവാക്കിയ 'അരിക്കൊമ്പന്' എന്ന് നാട്ടുകാര് വിളിക്കുന്ന ആനയുടെ പരാക്രമം ഇതേ കടയില് ഈ വര്ഷം തന്നെ ഇത് നാലാം തവണയാണ്. വെള്ളിയാഴ്ച പുലര്ച്ചെയാണ് ആനയുടെ ഏറ്റവും പുതിയ ആക്രമണം ഉണ്ടായത്.
അരി തിന്നാന് എത്തിയ ആനയെ നാട്ടുകാര് ഓടിച്ചു. ശാന്തന്പാറയില് 26 വര്ഷമായി ആന്റണി റേഷന്കട നടത്താന് തുടങ്ങിയിട്ട്. കട അരിക്കൊമ്പന് ആക്രമിക്കുന്നത് പതിവായി മാറിയിരിക്കുകയാണ്. കട ആക്രമിക്കുന്ന ആന കടയിലെ അരിയടക്കമുള്ള ഭക്ഷ്യവസ്തുക്കള് തിന്നുകയാണെന്ന് നാട്ടുകാര് പറയുന്നു. ആനയുടെ ആക്രമണം പതിവായതോടെ ആന്റണി ഭക്ഷ്യവസ്തുക്കള് മറ്റൊരു സ്ഥലത്തേക്ക് മാറ്റിയിരുന്നു.
വെറും പത്തു ദിവസത്തിനിടെ ഇത് നാലാം തവണയാണ് അരിക്കൊമ്പന് തന്റെ റേഷന് തേടി ആന്റണിയുടെ കടയില് വരുന്നത്. എന്നാല് ആനയുടെ ആക്രമണം മൂന്കൂട്ടി കണ്ട് ആന്റണി സാധനങ്ങള് മാറ്റിയിരുന്നതിനാല് കാര്യമായ നഷ്ടം ഭക്ഷ്യവസ്തുക്കളില് ഉണ്ടായിട്ടില്ല. പുലര്ച്ചെ അഞ്ചുമണിയോടെ എത്തിയ ആനയെ നാട്ടുകാര് ബഹളം വെച്ച് ഓടിക്കുകയായിരുന്നു. ശാന്തന്പാറ പന്നിയാര് എസ്റ്റേറ്റിലാണ് കട സ്ഥിതി ചെയ്യുന്നത്.
(വാര്ത്തയ്ക്കൊപ്പമുള്ളത് പ്രതീകാത്മകചിത്രം)
