കൊച്ചി/പത്തനംതിട്ട: ബജറ്റിലെ നികുതി വര്ധനവ് നിര്ദേശത്തിനെതിരെ യൂത്ത് കോണ്ഗ്രസ് സംസ്ഥാന വ്യാപകമായി നടത്തുന്ന പ്രതിഷേധം രണ്ടാം ദിവസവും സംഘര്ഷഭരിതമായി. എറണാകുളത്ത് കണയന്നൂര് താലൂക്ക് ഓഫീസിലേക്കും പത്തനംതിട്ട കലക്ടറേറ്റിലേക്കുമാണ് പ്രതിഷേധ മാര്ച്ച് നടന്നത്. യൂത്ത് കോണ്ഗ്രസ് ജില്ലാ കമ്മറ്റികളുടെ നേതൃത്വത്തിലായിരുന്നു മാര്ച്ച്.
ജനദ്രോഹ ബജറ്റ് പിന്വലിക്കുക എന്ന മുദ്രാവാക്യമാണ് പ്രവര്ത്തകര് ഉയര്ത്തുന്നത്. എറണാകുളത്ത് ബാരിക്കേഡുകള് മറിച്ചിട്ട പ്രതിഷേധക്കാര് പോലീസിനു നേര്ക്ക് കുപ്പിയെറിഞ്ഞു. പോലീസ് ജലപീരങ്കിയെറിഞ്ഞു. നിലത്തുകിടന്ന് പ്രതിഷേധിച്ച പ്രവര്ത്തകരെ പോലീസ് വലിച്ചിഴച്ച് വാഹനത്തില് കയറ്റി. പോലീസ് വാഹനത്തില് നിന്നുകൊണ്ട് പോലീസിനു നേര്ക്ക് പ്രതിഷേധിച്ചു. ഇവരെയും കൊണ്ടുള്ള വാഹനം സ്റ്റേഷനിലേക്ക് കൊണ്ടുപോയി.
നിരവധി പ്രവര്ത്തകര് ഇപ്പോഴും പോലീസ് കസ്റ്റഡിയിലാണ്. നിരവധി പേര്ക്ക് സംഘര്ഷത്തില് പരിക്കേറ്റു. ഇവരെ ജനറല് ആശുപത്രിയിലേക്ക് മാറ്റി. പോലീസ് ബൂട്ടിട്ട് ചവട്ടിയെന്നും തലയ്ക്ക് അടിച്ചുവെന്നും റോഡിലൂടെ വലിച്ചിഴച്ചുവെന്നും പരിക്കേറ്റ പ്രവര്ത്തകന് പറഞ്ഞു.
പോലീസ് നടപടിയില് പ്രതിഷേധിച്ച് പ്രവര്ത്തകര് റോഡ് ഉപരോധിക്കുകയാണ്.
