തൃശൂർ: ചാലക്കുടി മേലൂർകുന്നിൽ അമ്മയും ആറുവയസ്സുകാരിയായ മകളും കിണറ്റിൽ വീണെങ്കിലും അഗ്നിരക്ഷാ സേനയുടെയും നാട്ടുകാരുടെയും സമയോചിത ഇടപെടലിൽ ഇരുവരെയും രക്ഷപ്പെടുത്തി. മേലൂർകുന്ന് സ്വദേശി സൈന സന്തോഷും മകൾ അന്ന സന്തോഷുമാണ് അപകടത്തിൽപ്പെട്ടത്.
സംഭവം അറിഞ്ഞ ഉടൻ അയൽവാസിയായ ജോഷി കിണറ്റിലിറങ്ങി രക്ഷാപ്രവർത്തനം ആരംഭിച്ചെങ്കിലും ഇരുവരെയും പുറത്തെടുക്കാൻ സാധിച്ചില്ല. തുടർന്ന് കയറിൽ പിടിച്ചുനിന്ന ഇവർക്കരികിലേക്ക് അഗ്നിരക്ഷാ സേന എത്തി രക്ഷാപ്രവർത്തനം ഏറ്റെടുത്തു.
ചാലക്കുടി ഫയർ സ്റ്റേഷനിലെ അസിസ്റ്റന്റ് സ്റ്റേഷൻ ഓഫീസർ ആർ.കെ. രമേശ്, സീനിയർ ഫയർ ആൻഡ് റെസ്ക്യൂ ഓഫീസർ സനൽ ജ്യോതി എന്നിവരുടെ നേതൃത്വത്തിൽ ഫയർ ആൻഡ് റെസ്ക്യൂ ഓഫീസർ അനിൽ മോഹൻ കിണറ്റിലിറങ്ങി നെറ്റിന്റെ സഹായത്തോടെ അമ്മയെയും മകളെയും ജോഷിയെയും സുരക്ഷിതമായി പുറത്തേക്കെത്തിച്ചു. മറ്റ് അഗ്നിരക്ഷാ സേനാംഗങ്ങളും രക്ഷാപ്രവർത്തനത്തിൽ പങ്കെടുത്തു.
