കണ്ണൂര്: അദ്ധ്യാപിക വഴക്കുപറഞ്ഞതില് എട്ടാംക്ലാസ്സുകാരി ആത്മഹത്യ ചെയ്ത സംഭവം നടന്നത് എസ്എസ്എല്സി പ്ലസ് ടൂ പരീക്ഷയില് മികച്ച നേട്ടമുണ്ടാക്കുന്ന മികച്ച സര്ക്കാര് വിദ്യാലയങ്ങളിലൊന്ന്. പെരളശേരി എ.കെ.ജി. സ്മാരക ഹയര്സെക്കന്ഡറി സ്കൂളിലെ എട്ടാംക്ലാസ്സ് വിദ്യാര്ത്ഥിനി റിയാ പ്രവീണാണ് അദ്ധ്യാപികയുടേയും വിദ്യാര്ത്ഥികളുടേയും പേരെഴുതി ആത്മഹത്യ ചെയ്തത്.
എസ്.എസ്.എല് സി പ്ളസ് ടു പരീക്ഷകളില് നുറു മേനി കൊയ്യുന്ന സ്കൂളില് നന്നായി പഠിക്കുന്ന കുട്ടിയായിരുന്നു റിയ. ഐവര് കുളം സ്വപ്നക്കൂട്ടില് വി.എം. പ്രവീണിനും ഭാര്യ റീനയ്ക്കും ഏകമകളായിരുന്നു റിയ. എട്ടു വര്ഷത്തെ കാത്തിരിപ്പിന് ശേഷമാണ് ദമ്പതികള്ക്ക് മകളുണ്ടായത്. ദീര്ഘകാലത്തെ ചികിത്സയ്ക്കും പ്രാര്ത്ഥനയ്ക്കും ശേഷമാണ് ഇവര്ക്ക് പെണ്കുഞ്ഞ് പിറന്നത്.
റിയയുടെ ആത്മഹത്യാ കുറിപ്പില് അധ്യാപിക ശാസിച്ചെന്നും സഹപാഠി കളിയാക്കിയെന്നും കുറിച്ചിരുന്നു. സംഭവത്തില് പ്രതികരണവുമായി പി.ടി.എ. ഭാരവാഹികള് രംഗത്തുവന്നിട്ടുണ്ട്. 25,000 രൂപ പിഴയടക്കാന് പറഞ്ഞില്ലെന്നാണ് പി.ടി.എ യുമായി ബന്ധപ്പെട്ടവര് പറയുന്നത്. ബെഞ്ചില് പേരെഴുതി വെച്ചതിനെ ചൊല്ലി കുട്ടികള് തമ്മില് ചെറിയ തര്ക്കമുണ്ടായി. റിയയും കൂട്ടുകാരികളും മായ്ക്കാന് നോക്കിയപ്പോള് ഭിത്തിയിലും ബഞ്ചിലും മഷി പറ്റി. ഇതു ശ്രദ്ധയില്പ്പെട്ട ടീച്ചര് റിയ ഉള്പ്പെടെ നാലു കുട്ടികളോട് രക്ഷാകര്ത്താക്കാളെ കൊണ്ടുവന്ന് ക്ലാസില് കയറിയാല് മതിയെന്നു പറഞ്ഞതായാണ് വിവരം.
താന് ചാവുമെന്ന് റിയ കൂട്ടുകാരോട് പറഞ്ഞതായി സഹപാഠികളും മൊഴി നല്കിയിട്ടുണ്ട്. വിവരം കുട്ടികള് സ്കൂളില് പറഞ്ഞില്ല. വ്യാഴാഴ്ച വൈകുന്നേരം സ്കൂള് വിട്ടു വന്ന ശേഷമാണ് റിയ ആത്മഹത്യ ചെയ്തത്. വീടിന്റെ ജനല് കമ്പിയില് തൂങ്ങി മരിച്ച നിലയിലായിരുന്നു റിയയെ കണ്ടെത്തിയത്. റിയ സ്കൂളില് നിന്നും വരുന്ന സമയത്ത് മാതാപിതാക്കള് ജോലിക്ക് പോയിരുന്നു. സംസ്ഥാന ബാലാവകാശ കമ്മീഷനും അന്വേഷണം നടത്തിയിട്ടുണ്ട്.
