ഇഖ്റ ജവാനി എന്ന പെണ്കുട്ടി പാക്കിസ്ഥാന് അതിര്ത്തി കടന്ന് ഇന്ത്യയിലെത്തി കാമുകനൊപ്പം താമസിച്ച സംഭവം നിരവധി ചര്ച്ചകള്ക്ക് വിധേയമായിരുന്നു. എന്നാല് പെണ്കുട്ടി എങ്ങനെയാണ് വിസയില്ലാതെ അതിര്ത്തി കടന്ന് എത്തിയതെന്നത് ഭൂരിഭാഗം ആളുകള്ക്കും അത്ഭുതമായിരുന്നു. സംഭവത്തില് പുതിയ വെളിപ്പെടുത്തലുമായി പെണ്കുട്ടിയുടെ കുടുംബം ഇപ്പോള് രംഗത്തെത്തിയിരിക്കുകയാണ്.
ഒതുങ്ങിയ പ്രകൃതക്കാരിയായ പെണ്കുട്ടി ലൂഡോ കളിച്ചാണ് ഇന്ത്യക്കാരനായ മുലായം സിങ് യാദവുമായി പ്രണയത്തിലായത്. പ്രണയം പിരിയാന് കഴിയാത്ത അവസ്ഥയായപ്പോള് ഏറെ സാഹസികമായി ഇന്ത്യയിലേക്ക് പുറപ്പെടുകയായിരുന്നു. നീക്കങ്ങളെല്ലാം വളരെ രഹസ്യമായിട്ടാണ് പെണ്കുട്ടി വച്ചിരുന്നത്. സ്വന്തം ആഭരണങ്ങള് വിറ്റും കടം വാങ്ങിയുമാണ് വിമാന ടിക്കറ്റിനും ചെലവിനുമുള്ള പണം കണ്ടെത്തിയത്. ആദ്യം ദുബൈയിലേക്ക് വിമാനം കയറി. അവിടെ നിന്ന് വിമാന ടിക്കറ്റിനായി സുഹൃത്തക്കളില് നിന്ന് പണം കടം വാങ്ങി നേപ്പാളിലെ കാഠ്മണ്ഡുവിലെത്തി. ഇഖ്റ കാഠ്മണ്ഡുവിലെത്തിയപ്പോള് മുലായം സിങും അവിടെ എത്തിയിരുന്നു. തുടര്ന്ന് ഇരുവരും വിവാഹം കഴിക്കുകയും അതിര്ത്തി കടന്ന് ബീഹാറിലെത്തുകയും ചെയ്തു. ബീഹാറില് നിന്നാണ് ബെംഗളൂരുവില് എത്തിയത്.
കഴിഞ്ഞ സെപ്റ്റംബറിലാണ് കോളേജില് പോയ ഇഖ്റയെ കാണാതായത്. അവളുമായി ബന്ധപ്പെടാന് കുടുംബം ശ്രമിച്ചുവെങ്കിലും പരാജയപ്പെട്ടിരുന്നു. ഒടുവില് മകളെ കാണാനില്ലെന്ന് കരുതി കുടുംബം എന്നന്നേക്കുമായി അന്വേഷണം അവസാനിപ്പിച്ചുവെന്ന് ഇഖ്റയുടെ പിതാവ് സൊഹൈല് ജീവാനി പറഞ്ഞു. അവള്ക്ക് ഇന്ത്യയിലേക്ക് പോകാന് എങ്ങനെ ധൈര്യം ലഭിച്ചുവെന്ന് ഞങ്ങള്ക്ക് ഇപ്പോഴും അറിയില്ല. സംഭവത്തില് ഞങ്ങളും അത്ഭുതപ്പെട്ടിരിക്കുകയാണെന്നും അദ്ദേഹം പറഞ്ഞു. കഴിഞ്ഞ നാല് മാസത്തിനിടെ സംഭവിച്ചതിന്റെ ഞെട്ടലില് നിന്ന് കുടുംബം കരകയറിയിട്ടില്ലെന്നും പിതാവ് വെളിപ്പെടുത്തി.
കറാച്ചിയില് നിന്ന് ദുബായിലേക്കും അവിടെ നിന്ന് കാഠ്മണ്ഡുവിലേക്കും തുടര്ന്ന് ഇന്ത്യയിലേക്കും 16 കാരിയായ ഇഖ്റ എങ്ങനെയാണ് എത്തിയതെന്ന് ആര്ക്കും കണ്ടെത്താന് കഴിഞ്ഞിട്ടില്ല. മുലായം യാദവ് തന്റെ പേര് മാറ്റിയാണ് പെണ്കുട്ടിയുമായി അടുത്തതെന്നാണ് കുടുംബം ആരോപിക്കുന്നത്. സോഫ്റ്റ്വെയര് എഞ്ചീനീയറായ സമീര് അന്സാരിയാണെന്നാണ് യുവാവ് പറഞ്ഞത്. ഇഖ്റ ഇന്ത്യയിലേക്ക് പുറപ്പെടാന് വിസക്കായി ശ്രമിച്ചെങ്കിലും പരാജയപ്പെട്ടതിനെ തുടര്ന്നാണ് ദുബൈ കാഠ്മണ്ഡു വഴി ഇന്ത്യയിലേക്ക് എത്തയതെന്ന് പെണ്കുട്ടിയുടെ അമ്മാവന് അഫ്സല് ജീവാനി പറഞ്ഞു.
കഴിഞ്ഞ മാസമാണ് പെണ്കുട്ടിയെയും മുലായം യാദവ് സിങിനെയും പോലീസ് കസ്റ്റഡിയിലെടുത്തത്. തുടര്ന്ന് കഴിഞ്ഞ ദിവസം ഇന്ത്യന് അധികൃതര് ലാഹോറിലെത്തി പെണ്കുട്ടിയെ പാക്കിസ്ഥാന് കുടുംബത്തിന് കൈമാറി.
