ഒരു ഫോട്ടോഗ്രാഫറിനെ സംബന്ധിച്ച് തന്റെ ക്യാമറയ്ക്കുള്ളില് പതിയുന്ന ഏറ്റവും നല്ല ഫ്രെയിം പകര്ത്തുകയെന്നത് വലിയൊരു സ്വപ്നസാക്ഷാത്കാരമാണ്. അതിനു ചിലപ്പോള് ദിവസങ്ങളും മാസങ്ങളും മറ്റു ചിലപ്പോള് വര്ഷങ്ങളും കാത്തിരിക്കേണ്ടി വരും. കാണുന്നവര്ക്ക് ഒരു ആസ്വാദനം മാത്രമാണെങ്കില് ഫോട്ടോഗ്രാഫറെ സംബന്ധിച്ച് അത് തങ്ങളുടെ പെര്ഫക്ട് ക്ലിക്കെന്ന സ്വപ്നത്തിലേക്കുള്ള യാത്രയാണ്.
ഇപ്പോഴിതാ സ്വിസ് ഫോട്ടോഗ്രാഫർ ടോബിയാസ് മെസ്സെർലി പകര്ത്തിയ ഒരു സൂര്യന്റെ ചിത്രമാണ് സോഷ്യല് മീഡിയയില് വൈറലാകുന്നത്. സായംസന്ധ്യയില് മുങ്ങി നില്ക്കുന്ന അസ്തമയ സൂര്യൻ നെതർലൻഡ്സിലെ ഒരു മരത്തിന്റെ ശിഖരങ്ങൾക്കുള്ളിൽ ഫ്രെയിം ചെയ്തിരിക്കുന്ന ദൃശ്യമാണ് ഫോട്ടോഗ്രാഫര് പകര്ത്തിയത്. തിളങ്ങുന്ന ഒരു അലങ്കാരം പോലെ തോന്നിക്കുന്ന ഈ ചിത്രം 2026 ഏപ്രിലിൽ പകര്ത്തിയതാണ്. പൊതുവേ എഐ ചിത്രങ്ങളുടെ അതിപ്രസരമുള്ളതിനാല് ഈ ചിത്രവും അങ്ങനെയാണോ എന്ന സംശയമാണ് കാഴ്ച്ചക്കാര് ആദ്യം പ്രകടിപ്പിച്ചത്. എന്നാലത് അങ്ങനെയല്ല എന്ന് തെളിഞ്ഞതോടെ ചിത്രത്തെയും ഫോട്ടോഗ്രാഫറെയും വാനോളം പുകഴ്ത്തുകയാണ് സോഷ്യല് മീഡിയ. സൂര്യനെ കൃത്യമായി പകര്ത്താന് ഒരു നീണ്ട ടെലിഫോട്ടോ ലെൻസുള്ള ക്യാമറയില് പകര്ത്തിയതാണ് ഈ ചിത്രം.
