തിരുവനന്തപുരം: സാംസണ് ആന്ഡ് സണ്സ് ബില്ഡേഴ്സ് ആന്ഡ് ഡെവലപ്മെന്റ് പ്രൈവറ്റ് ലിമിറ്റഡ് കമ്പനിയുടെ പേരില് ഫ്ളാറ്റുകള് നിര്മിച്ചുനല്കാമെന്നു പറഞ്ഞ് കോടികള് തട്ടിയ കേസില് നടി ധന്യ മേരി വര്ഗീസ്, ഭര്ത്താവും നടനുമായ ജോണ് ജേക്കബ്, ജോണിന്റെ സഹോദരന് സാമുവല് ജേക്കബ് എന്നിവര് അറസ്റ്റില്. പ്രത്യേകാന്വേഷണസംഘം നാഗര്കോവിലില്നിന്നാണ് ഇവരെ പിടികൂടിയത്.
ഷാരോണ് ഹില്സ്, ഓര്ക്കിഡ് വാലി, സാങ്ച്വറി, പേള് ക്രസ്റ്റ്, സെലേന് അപ്പാര്ട്ട്മെന്റ്, നോവ കാസില്, മെരിലാന്ഡ്, ഗ്രീന് കോഡ്ഡ് യാഡ്, ഏഞ്ചല്വുഡ് എന്നീ പ്രോജക്ടുകളിലായി 2011 മുതല് തിരുവനന്തപുരം നഗരത്തിന്റെ വിവിധ മേഖലകളില് ഫ്ളാറ്റുകളും വില്ലകളും നിര്മിച്ചുനല്കാമെന്നു വാഗ്ദാനം ചെയ്തായിരുന്നു തട്ടിപ്പ്. അഞ്ഞൂറോളം ഫ്ളാറ്റുകളും ഇരുപതോളം വില്ലകളും രണ്ടുവര്ഷത്തിനുള്ളില് പൂര്ത്തിയാക്കുമെന്നായിരുന്ന പേരില് ആളുകളില്നിന്ന് ഏകദേശം 100 കോടി രൂപയും അമിതപലിശ വാഗ്ദാനം ചെയ്ത് നിക്ഷേപകരില്നിന്നു 30 കോടിയോളം രൂപയും തട്ടിയെന്നാണ് പോലീസ് പറയുന്നത്.
സാംസണ് ഗ്രൂപ്പ് ഉടമയും ജോണിന്റെയും സാമുവലിന്റെയും പിതാവുമായ ജേക്കബ് സാംസണ് നേരത്തേ അറസ്റ്റിലായിരുന്നു. ധന്യയുടെ താരപരിവേഷം തട്ടിപ്പിനു സഹായകമായി. ഫ്ളാറ്റുകള്ക്കു പണം കൊടുത്ത പലരും വിദേശത്താണ്.
അവരുടെ പരാതികള്കൂടിയാകുമ്പോള് തട്ടിപ്പിന്റെ വ്യാപ്തി വര്ധിക്കും. കേസിലെ മുഖ്യപ്രതിയും സാംസണ് ആന്ഡ് സണ്സ് കമ്പനി ചെയര്മാനുമായ ജേക്കബ് സാംസണെ അന്വേഷണസംഘം നേരത്തേ അറസ്റ്റ് ചെയ്തിരുന്നു. തട്ടിപ്പുകളിലൂടെ പ്രതികള് സമ്പാദിച്ച പണം വിദേശത്തു നിക്ഷേപിക്കുകയോ വസ്തുവകകള് വാങ്ങുകയോ ചെയ്തിട്ടുണ്ടോയെന്ന് അന്വേഷിച്ചുവരുന്നു. ഒരു അഭിഭാഷകയും ഭര്ത്താവും ചേര്ന്നാണ് ഒളിവില് കഴിയാന് ഇവര്ക്കു സൗകര്യമൊരുക്കിയതെന്ന് അന്വേ ഷണോദ്യോഗസ്ഥര് പറഞ്ഞു.
ബംഗളുരു, മുംബൈ എന്നിവിടങ്ങളിലും കേരളത്തിലെ പല സ്ഥലങ്ങളിലും ഒളിവില്കഴിഞ്ഞ പ്രതികളെ നാഗര്കോവിലില്നിന്നു സിറ്റി പോലീസ് കമ്മിഷണറുടെ നേതൃത്വത്തിലുള്ള പ്രത്യേകസംഘത്തിലെ തിരുവനന്തപുരം സിറ്റി ജില്ലാ ക്രൈംബ്രാഞ്ച് അസി. കമ്മിഷണര് എം.എസ്. സന്തോഷ്, പേരൂര്ക്കട ഇന്സ്പെക്ടര് സുരേഷ് ബാബു തുടങ്ങിയവരുടെ നേതൃത്വത്തിലാണ് അറസ്റ്റ് ചെയ്തത്. കോടതിയില് ഹാജരാക്കിയ പ്രതികളെ 14 ദിവസത്തേക്കു റിമാന്ഡ് ചെയ്തു. ഇവരെ പോലീസ് കസ്റ്റഡിയില് വാങ്ങും.
