ന്യൂഡല്ഹി: അഴിമതിക്കേസില് അറസ്റ്റിലായ ഡല്ഹി ഉപമുഖ്യമന്ത്രി മനീഷ് സിസോദിയയടേയും ആരോഗ്യമന്ത്രി സത്യേന്ദ്ര ജെയിന്റേയും സ്ഥാനത്ത് എംഎല്എ മാരായ സൗരഭ് ഭരദ്വാജും ആതിഷിയും മന്ത്രിമാരാകും. ഇരുവരുടേയും രേഖകള് ഗവര്ണര് വി.കെ. സക്സേനയ്ക്ക് മുഖ്യമന്ത്രിയും ആംആദ്മിപാര്ട്ടി നേതാവുമായ അരവിന്ദ് കെജ്രിവാള് അയച്ചു.
ദക്ഷിണ ഡല്ഹിയിലെ കൈലാഷ് മണ്ഡലത്തിലെ എംഎല്എ ആണ് ഭരദ്വാജ്. ഡല്ഹി ജല് ബോര്ഡിന്റെ വൈസ് ചെയര്മാന് കൂടിയാണ് ഭരദ്വാജ്. 2013-14 കാലത്ത് 49 ദിവസം നീണ്ട ആംആദ്മി സര്ക്കാരിലെ ക്യാബിനറ്റ് മന്ത്രിയായിരുന്നു. കല്ക്കാജിയിലെ എംഎല്എയാണ് ആതിഷി. 2015 നും 2017 നും ഇടയില് സിസോസിദയുടെ ഉപദേശകയായി പ്രവര്ത്തിച്ചിട്ടുണ്ട്.
മദ്യനയ അഴിമതിക്കേസില് സി.ബി.ഐ. അറസ്റ്റ് ചെയ്തതിന് പിന്നാലെ മന്ത്രിസ്ഥാനം സിസോദിയ രാജിവെച്ചിരുന്നു. കള്ളപ്പണക്കേസില് സത്യേന്ദ്ര ജെയിനിനെ എന്ഫോഴ്സ്മെന്റ് ഡയറക്ടറേറ്റും അറസ്റ്റ് ചെയ്തു. ആം ആദ്മി പാര്ട്ടിയില് രണ്ടാമനായ സിസോദിയയുടെ അറസ്റ്റ് പാര്ട്ടിക്കും ഡല്ഹി സര്ക്കാരിനും കനത്ത തിരിച്ചടിയാണ്. ഇരുവരുടെയും രാജി മുഖ്യമന്ത്രി അരവിന്ദ് കെജ്രിവാള് അംഗീകരിച്ചു.
സി.ബി.ഐ. അറസ്റ്റിനെതിരായ ഹര്ജി സുപ്രീം കോടതി ഫയലില് സ്വീകരിക്കാന് വിസമ്മതിച്ചതിനെത്തുടര്ന്നാണ് സിസോദിയ രാജിവച്ചത്. ഹൈക്കോടതിയെ സമീപിക്കാനായിരുന്നു ചീഫ് ജസ്റ്റിസ് അധ്യക്ഷനായ ബെഞ്ചിന്റെ നിര്ദേശം. സിസോദിയയുടെ അറസ്റ്റ് നിയമവിരുദ്ധമാണെന്നും സി.ബി.ഐ. കുറ്റപത്രത്തില് അദ്ദേഹത്തിന്റെ പേരില്ലെന്നും പരിശോധനയില് കണക്കില്പെടാത്ത പണം പിടിച്ചെടുത്തിട്ടില്ലെന്നും സിസോദിയയുടെ അഭിഭാഷകന് അഭിഷേക് സിങ്വി വാദിച്ചു. എന്നാല്, നേരിട്ടു സുപ്രീം കോടതിയിലേക്കു വരുന്നതു മോശം കീഴ്വഴക്കമാണെന്നും ഡല്ഹിയില് ആയതുകൊണ്ടു മാത്രം ഇങ്ങനെ ചെയ്യാന് കഴിയില്ലെന്നും ജസ്റ്റിസ് പി.എസ്. നരസിംഹ പറഞ്ഞു.
2021 ജൂണില് മാധ്യമപ്രവര്ത്തകനായ വിനോദ് ദുബെയ്ക്കെതിരായ രാജ്യദ്രോഹക്കേസ്, ദുബെ നേരിട്ടു സുപ്രീം കോടതിയെ സമീപിച്ചതിനെത്തുടര്ന്നു റദ്ദാക്കിയ കാര്യം സിങ്വ് ചൂണ്ടിക്കാട്ടി. ദുബെയുടേത് അഭിപ്രായ സ്വാതന്ത്ര്യവുമായി ബന്ധപ്പെട്ട കേസാണെന്നും ഇത് അഴിമതി കേസാണെന്നും കോടതി പറഞ്ഞു. കോവിഡ് 19 മഹാമാരി കൈകാര്യം ചെയ്തതില് കേന്ദ്ര സര്ക്കാരിനു വീഴ്ച വന്നെന്നു വിമര്ശിച്ചതിന്റെ പേരിലാണ് ദുബെയ്ക്കെതിരേ കേസെടുത്തത്. കോടതി വിധിയെത്തുടര്ന്ന് സിസോദിയ ഹര്ജി പിന്വലിച്ചു.
