ലോകകപ്പ് നേട്ടത്തിന് പിന്നാലെ ദേശീയടീമിലെ തന്റെ സഹതാരങ്ങള്ക്കും സപ്പോര്ട്ടിംഗ് സ്റ്റാഫിനും സ്വര്ണ്ണ ഐഫോണ് സമ്മാനിച്ച് ലിയോണേല് മെസ്സി. സ്വര്ണ്ണം പൊതിഞ്ഞ ഐഫോണാണ് താരം ഓര്ഡര് നല്കിയത്. 1,75,000 യൂറോയാണ് താരം ഇതിനായി ചെലവാക്കിയത്. ഏകദേശം 1.73 കോടി രൂപയോളം. ലിയോണേല് മെസ്സി ഉള്പ്പെടെയുള്ള വന് താരങ്ങളുടെയെല്ലാം വലിയ സ്വപ്നമാണ് ലോകകപ്പ്.
ഓരോ ഫോണിലും താരങ്ങളുടെ പേരും ജഴ്സിനമ്പറും അര്ജന്റീനയുടെ ചിഹ്നവും കൊത്തിയിട്ടുണ്ട്. 2022 അവസാനം ഖത്തറില് നടന്ന ലോകകപ്പില് അര്ജന്റീനയായിരുന്നു ജേതാക്കളായത്. ഫ്രാന്സിനെ വീഴ്ത്തി അര്ജന്റീന കപ്പടിച്ചപ്പോള് അത് മെസ്സിയുടേയും ആദ്യലോകകപ്പായിരുന്നു. ഈ നേട്ടം സ്പെഷ്യലായി ആഘോഷിക്കാന് ഫുട്ബോള്രാജാവ് നേരത്തെ തന്നെ തീരുമാനിച്ചിരുന്നു.
അതിശയകരമായ വിജയം ആഘോഷിക്കാന് ഏറ്റവും സ്പെഷ്യലായ സമ്മാനം തന്നെ വേണമെന്നും അത് വാച്ചുകളൊക്കെ പോലെയുള്ള പതിവ് വസ്തുക്കള് ആകരുതെന്നും മെസ്സി പറഞ്ഞിരുന്നതായി ഐഡിസൈന് ഗോള്ഡിന്റെ സിഇഒ ആയ ബെന് പറയുന്നു. ഈ സമയത്ത് താനാണ് കളിക്കാരുടെ പേരും നമ്പറും കൊത്തിയ സ്വര്ണ്ണ ഐഫോണിനെക്കുറിച്ച് പറഞ്ഞതെന്നും പറയുന്നു. ഐഫോണ് 14 ആയിരുന്നു സമ്മാനം.
