ബഹ്റെയ്ക്ക്: പണം തന്നില്ലെങ്കില് ബോംബ് വെച്ചു കൊല്ലുമെന്ന് വനിതാ ജില്ലാ ജഡ്ജിക്ക് ജയിലില് കിടക്കുന്ന ക്രിമിനലിന്റെ ഭീഷണിക്കത്ത്. ഉത്തര്പ്രദേശിലെ ബെറെയ്ലിയില് കഴിഞ്ഞ ദിവസം ജഡ്ജി പ്രേംകല സിംഗിന് ജയില് ശിക്ഷ അനുഭവിക്കുന്ന ബഡ്കാവു എന്ന രാജകുമാര് സ്പീഡ് പോസ്റ്റിലായിരുന്നു കത്തയച്ചത്. ജഡ്ജിയുടെ ഓഫീസില് കത്ത് ലഭിച്ചു.
ജയില് ഡോക്ടറായ നെം ചന്ദ്രയ്ക്ക് അഞ്ചു ലക്ഷം രൂപ നല്കണമെന്നാണ് ജില്ലാ ജയിലില് കിടക്കുന്ന ബഡ്കാവു കത്തില് ആവശ്യപ്പെട്ടിരിക്കുന്നത്. തന്റെ നിര്ദേശങ്ങള് അവഗണിച്ചാല് ഓഫീസിനുള്ളിലിട്ട് ബോംബ് വെച്ചു കൊല്ലുമെന്നാണ് ഭീഷണി ഉയര്ത്തിയിരിക്കുന്നത്. സംഭവത്തില് ജഡ്ജിയെ ഭീഷണിപ്പെടുത്തി എന്ന കുറ്റത്തിന് ക്രിമിനലിനെതിരേ മറ്റൊരു കേസ് കൂടി ചാര്ജ്ജ് ചെയ്യാന് ഇടയാക്കി.
സംഭവത്തില് അന്വേഷണം ആരംഭിച്ചിട്ടുണ്ട്. കോത്വാളി പോലീസ് സ്റ്റേഷനില് അഡ്മിനിസ്ട്രേറ്റീവ് ഓഫീസറാണ് ഇക്കാര്യത്തില് പരാതി നല്കിയിരിക്കുന്നത്. കത്തിലെ കാര്യങ്ങള് ഗൗരവമായിട്ടാണ് എടുക്കുന്നതെന്നും ക്രൈംബ്രാഞ്ചിനെ കേസ് ഏല്പ്പിച്ചിട്ടുണ്ടെന്നും ബെറേലി പോലീസിനോടും പോസ്റ്റോഫീസിനോടും ബന്ധപ്പെട്ടിട്ടുണ്ടെന്നും എസ്പി സാലിഗ്രാം വര്മ്മ വ്യക്തമാക്കി.
