ന്യൂഡല്ഹി: അടുത്ത തവണ കേരളത്തില് കോണ്ഗ്രസ് അധികാരം നേടിയാല് ഗോവധനിരോധനം ഉണ്ടാകുമെന്ന് പ്രചരണം. കോണ്ഗ്രസ് നേതാവ് പ്രിയങ്കാഗാന്ധിയുടെ പേരില് വാട്ട്സാപ്പും ഫേസ്ബുക്കും അടക്കമുള്ള സാമൂഹ്യമാധ്യമങ്ങളിലൂടെ പോസ്റ്ററുകള് വ്യാപകമായി പ്രചരിക്കുകയാണ്.
എന്നാല് സംഭവത്തിന്റെ നിജസ്ഥിതി വെളിപ്പെടുത്തി കെപിസിസി ഡിജിറ്റല് മീഡിയ രംഗത്ത് വന്നിട്ടുണ്ട്. പ്രിയങ്കാ ഗാന്ധിയുടെ ചിത്രത്തോടൊപ്പമുള്ള കോണ്ഗ്രസിന്റേത് എന്ന രീതിയില് പുറത്തുവന്ന പോസ്റ്ററുകള് വ്യാജമാണെന്നാണ് ഇവര് പറയുന്നത്. അതേസമയം പോസ്റ്ററുകള് ഏതു കോണില് നിന്നുമാണ് വന്നിരിക്കുന്നതെന്ന് ഇവര് വ്യക്തമാക്കിയിട്ടില്ല. പോസ്റ്റര് കോണ്ഗ്രസിനകത്തും തര്ക്കമുണ്ടാക്കിയിരുന്നു.
തന്റെ പേരില് പോസ്റ്ററുകള് പ്രചരിക്കുമ്പോള് പ്രിയങ്കാഗാന്ധി ഷിംലയിലാണ്. ചറബറയിലെ വീട്ടില് കഴിഞ്ഞ ദിവസം എത്തിയ പ്രിയങ്ക അവിടെ ഒരാഴ്ചത്തെ അവധി ചെലവഴിക്കും. അതിന് ശേഷമാകും ഡല്ഹിയിലേക്ക് മടങ്ങുക. വിശ്രമത്തിന് മാത്രമായി എത്തിയ പ്രിയങ്ക രാഷ്ട്രീയ പരിപാടികളില് നിന്നും രാഷ്ട്രീയ നേതാക്കളെ കാണുന്നതില് നിന്നുമെല്ലാം ഒഴിഞ്ഞു നില്ക്കും.
