ഖത്തര് ലോകകപ്പിലെ സൂപ്പര് ഗോള്ക്കീപ്പര് എമിലിയാനോ മാര്ട്ടിനസ് കുട്ടികളുടെ ക്യാന്സര് ആശുപത്രിക്ക് കൈത്താങ്ങായി. ലോകകപ്പില് ധരിച്ച് ഗ്ലൗസ് ലേലത്തില് വിറ്റത് വന്തുകയ്ക്ക്. അര്ജന്റീനയുടെ കിരീട നേട്ടത്തില് മെസിയോളം പങ്കു വഹിച്ച താരമാണ് എമിലിയാനോ മാര്ട്ടിനെസ്. ഫൈനലില് ഫ്രാന്സുമായുള്ള പെനാല്റ്റി ഷൂട്ടൗട്ടില് നിര്ണായകമായി മാറിയ ഗ്ലൗസുകള് ലേലത്തില് പോയത് 45,000 ഡോളറിനാണ്.
വെള്ളിയാഴ്ച്ച ഓണ്ലൈനിലൂടെയാണ് ലേല നടപടികള് നടന്നത്. എമിലിയാനോയുടെ കൈയൊപ്പോടുകൂടിയാണ് ഗ്ലൗസ് ലേലത്തില് വച്ചത്. അര്ജന്റീന പീഡിയാട്രിക്ക് ഫൗണ്ടേഷനാണ് വാര്ത്ത പുറത്തുവിട്ടത്. കാന്സര് ബാധിച്ച കുട്ടികളെ ചികിത്സിക്കുന്ന ആശുപത്രിക്കാണ് താരത്തിന്റെ സംഭാവന. 36.8 ലക്ഷം രൂപക്കാണ് ഒടുവില് ഗ്ലൗവ് വിറ്റുപോയത്.
ലേലത്തില് ലഭിച്ച മുഴുവന് തുകയും ആശുപത്രിയുടെ പ്രവര്ത്തനങ്ങള്ക്കായി താരം കൈമാറി. കുട്ടികളെ സഹായിക്കുന്നതിനേക്കാള് വലുതല്ല ലോകകപ്പ് നേടിയ ഗ്ലൗസുകളെന്ന് താരം ലേലത്തിന് ശേഷം പ്രതികരിച്ചു. ടൂര്ണമെന്റിലെ മികച്ച ഗോള് കീപ്പര്ക്കുള്ള പുരസ്കാരവും ഫിഫ ദ ബെസ്റ്റിലെ മികച്ച ഗോള് കീപ്പര്ക്കുള്ള പുരസ്കാരവും എമി സ്വന്തമാക്കിയിരുന്നു.
